Promé Minister Gilmar Pisas tabata presente na dia di Sabaneta

Na e okashon aki Promé Minister a keda invitá pa hiba un diskurso.

Eksaktamente 369 aña pasá, esnan ku tabata goberná nos Pais e tempu ei a duna òrdu pa traha un plantashi na Sabaneta.

Nan a kuminsá ku kultivo di Kaña, Maishi, Maishi Chikí, Pinda, Palu di Brasía i tambe Bonchi di Dividivi.

Ku eksepshon di kultivo di Kaña, tur a logra i esaki a duna e Plantashi di Sabaneta e nòmber di Plantashi Produktor.

E plantashi a keda kambiá di doño varios bia i durante di e invashon Inglés na aña 1806 e Landhuis di Plantashi Sabaneta a keda invadí, di plunder i mitar kimá.

Despues di a keda nuebe aña kasi inaktivo Plantashi di Sabaneta, den un benta públiko a keda bendé na Sr. Mathias van der Dijs, kende a hasi Plantashi di Sabaneta é Plantashi Produktor di mas grandi ku Kòrsou a konosé e tempu ei.

Aparte di e produktonan menshoná kaba Plantashi di Sabaneta tabata produsí tambe Lechi, Kalmèki, berdura fresku, karni di Baka i Karné, lana di Karné, karbon i varios produkto mas.

Dor di ku e plantashi tabatin un variedat di posnan di awa i tambe un bon sistema di maneho di awaseru, kombiná ku sistemanan modernu pa e tempu ei tabata posibel pa por a produsí henter aña.

Ku eksepshon di djádumingu kasi tur dia garoshinan, halá pa mulanan, tabata sali di Sabaneta bai Punda pa hiba produktonan, i tambe dor di garoshinan halá pa mula i bakanan tabata hiba produktonan otro plantashinan den besindario.

Despues di liberashon di Katibunan, Plantashi di Sabaneta a keda ku su nòmber di Plantashi Produktor i te den añanan 1960 Plantashi di Sabaneta tabata entregá lechi tur dia na e.o. e tempu ei Sanatorium, ku tabata e hospital di Shell Kòrsou.

Ku fayesimentu di e último doño di Sabaneta na aña 1965 i despues benta di e plantashi na Gobièrnu di Kòrsou na aña 1969, a bini un fin na e aktividadnan aki.

Sinembargo esaki no a nifiká ku a yega un fin na e historia i tambe e herensha kultural ku tur e kosnan aki a laga patras.

Ta pesei e Gobièrnu aki ta aploudí tur e esfuersonan ku awendía ta keda hasí pa tene e rekuerdonan aki bibu.

Di parti di Carmabi a restaurá e landhuis i e otro edisfisionan ku ta pertenesé na e bunita monumentu aki. Tambe tin planesnan andando pa realisá den e parke un Museo di aire liber, i ku e trabounan preparativo ya ta kanando.

Esaki lo nifiká ku pronto e bishitantenan di Parke San Kristòf lo por bishitá tur e konstrukshonan monumental ku tin den e parke manera posnan, posnan di pia, murayanan di piedra, bakinan di awa i nan akuaduktonan, damnan di piedra i bakinan den kua tabata prosesá índigo, ruínanan di kasnan di plantashinan i di magasinanan, tur esakinan ta monumentunan di varios shen aña bieu.

Pues tin diferente moveshon i desaroyo positivo aki na Sabaneta i esaki ta netamente loke e Gobièrnu aki ta boga pé.

Desaroyonan ku por krea mas kupo di trabou i mas atrakshon pa nos mes hendenan i e turistanan ku ta bishitá nos por gosa di dje.

E kasnan di Katibu aki na Sabaneta ta úniko den área di Karibe, nan a keda deklará komo monumentunan protehá i sr. Echi Cijntje, habitante di Sabaneta a lanta un fundashon ku e meta pa restaurá e kasnan aki konforme reglanan di lei di monumentu di Kòrsou.

Na momentu ku e kasnan aki ta restaurá nan lo keda kombertí den un Eco- Resort, kaminda e bishitante, aparte di lo por gosa di e naturalesa ku Parke San Kristòf i restu di Kòrsou ta ofresé, lo por eksperenshá e bida di plantashi di 200 aña pasá.

Despues di gosa di un rekorido pa sera konosí ku e diferente aktvidatnan ku ta tuma lugá na Parke di St. Christoffel a sigui ku Promé Minister su diskurso a deklará e aktividat di Dia i Sabaneta habrí, i a sigui ku entrega ofishal di e derechonan di erfpacht pa e pida tereno riba kua e kasnan di katibu aki na Sabaneta ta ubiká, na presidente di e Fundashon pa Restaurashon i Mantenshon di Kasnan di Katibu na Sabaneta, señor Echi Cijntje.

Promé Minister a felisitá, na nòmber di Gobièrnu, na promé lugá e pueblo di Sabaneta, e pueblo di Banda Bou i e komunidat den su totalidat na Kòrsou pa ku e bunita proyekto aki.

Aparte di ku e proyekto aki ta un empuhe pa nos Turismo e lo nifiká tambe trabou pa nos hendenan.

SABANETA TIN DI BIRA GRANDI BEK MANERA E TABATA!!!!!