Promé Minister Gilmar Pisas tabatin e honor di tabata presente na entregá di e premio Cola Debrot na Landhuis Savonet
Publiká riba 03 Òktober 2021
Willemstad – Promé Minister Gilmar Pisas tabatin e honor di tabata presente na entregá di e premio Cola Debrot na Landhuis Savonet dia 2 di òktober 2021.
Minister di Enseñansa, Siensia, Kultura i Deporte Sithree A. van Heydoorn tambe tabata presente komo e minister ku ta enkargá ku e parti di Kultura.
E premio Cola Debrot pa 2021 a keda otorgá na sr. Philip (Fifi) Rademaker pa su esfuersonan grandi brindá riba tereno di literatura.
Premio Cola Debrot ta un premio riba tereno kultural ku for di 1968 ta keda otorgá na un persona òf organisashon ku a hasi trabounan meritorio riba tereno di arte.
E diferente kategorianan di arte ku ta keda premiá ta: arkitektura, arte visual, baile, folklor, literatura, músika, teater òf siensia.
E aña akí a toka turno na e kategoria di “Literatura”.
E proposishon pa otorgá Premio Cola Debrot ta keda hasí pa Konseho Kultural Kòrsou ku tur aña di nobo ta instituí un komishon independiente pa skohe ganador di e prestigioso premio. E aña akí entrega di e premio no a logra tuma lugá riba 4 di mei (fecha natal di Cola Debrot) pa motibu di sirkunstanshanan di COVID-19 i “lockdown”. Premio Cola Debrot ta konsistí di un boton di oro representando e flor di Laraha, un sertifikado i un suma.
Promé Minister tabatin e honor di pega e boton di oro ku ta representá e flor di Laraha.
Promé Minister ta felisitá sr. Philip (Fifi) Rademaker na nòmber di Gobièrnu di Kòrsou pa kere den Kòrsou, i pa sigui stimulá i guia nos komunidat pa amplia i elevá nos konosementu pa medio di literatura.
