Promé Minister Gilmas Pisas a reuní ku e representantenan di Sandals Royal Curaçao
Publiká riba 05 Òktober 2021
Willemstad – Promé Minister Gilmar Pisas a reuní ku representantenan di Sandals Royal Curacao, srs. Gebhard Rainer i Adam Steward.
Sandals Royal Curacao lo bira un “all inclusive resort” i ta situá na Sta. Barbara (Spaanse Water). Nan lema ta: what good is for Curacao is good for Sandals!
Promé Minister Gilmar Pisas a keda informá ku e proyekto ta kanando hopi bon, i ku e lo bira un “5 star resort”, ku lo krea un impakto ekonómiko di 25 pa 30 mion florin pa Kòrsou, ku ya tin kupo di trabou pa 250 hende pa ku e promé fase i esaki lo subi te na 450 kupo di trabou den e siguiente fase. Ta spera ku e resort aki por krea 800-850 kupo di trabou.
Pa e promé fase lo traha 350 kamber i despues lo amplia ku 100-120 kamber mas den e di dos fase.
Loke a keda tresé dilanti tambe ta ku e doñonan di e resort ke bini ku e plantashon di “Irish Potatoe”, i pues ta deseá di por traha huntu ku agrikultornan na Kòrsou pa por realisá e proyekto aki.
Tin intenshon pa hasi uso di e sistema di resiklahe pa evitá muchu uso di kosnan di plèstik.
E resort lo bai tin produkshon di su propio awa i lo bai hasi uso su panèl solar.
E resort lo bai traha ku kompanianan di aviashon manera Delta, Jet Blue, Air Canada i West Jet.
Ya tin 52% reservashon hasí ku ta kubri e lunanan di aprel, mei i yüni 2022. Esaki ta mustra ku e demanda ta hopi grandi pa Kòrsou. Esnan ku ta interesá ta bini for di Merka, Canada i Europa.
E resort lo tene kuenta tambe ku tur e medidanan di COVID i tin un plan hopi ekstenso pa ku e parti di hasi tèst i kon pa dil ku kualkier huéspet ku por keda infektá ku e virus aki.
Ta spera pa e resort aki habri dia 14 di aprel 2022 pa su huéspetnan
