Publiká riba 22 Sèptèmber 2023
Willemstad – Promé Minister sr. Gilmar Pisas ta hasi un invitashon spesial na nos komunidat di Kòrsou, den su totalidat, pa ban hasi orashon huntu dia 25 di sèptèmber 2023 di 6.30 pm pa 8.30 pm na Brionplein.
E ta importante pa nos pone Dios dilanti di tur kos den nos bida.
E la krea nos pa nos por forma un komunidat, kaminda nos ta duna i risibí apoyo di otro, loke ta kondusí na generosidat i gratitut.
Huntu kun’É i den Dje nos ta haña tur e fortalesa, konfiansa, fé, pas i trankilidat ku nos kada un tin mester pa por sirbi nos pais i nos mes, muchu mas mihó.
For di 2 Krónikanan 20:3 nos por mira ku lidernan sabí, semper a sa di bini huntu pa buska DIOS.
Nos Gobièrnu aktual ke partisipá i liderá nos hendenan siguiendo E Ser Supremo i su boluntat.
Kada miembro di nos komunidat su presensia lo ta altamente apresiá djaluna awor na Brionplein.
Pues konsiderá esaki komo un invitashon personal di parti boso Promé Minister sr. Gilmar Pisas.
Ban uni den orashon pa aserká nos Kreador!
