Publiká riba 09 Novèmber 2025
Willemstad – Djasabra 8 di novèmber 2025, Promé Minister Gilmar Pisas a tene un reunion ku Promé Minister di Hulanda, sr. Dick Schoof, durante un stòp riba su biahe pa Colombia i Brasil. Dia 9 di novèmber señor Schoof ta asistí na e konferensia di Union Europeo ku Komunidat di Paisnan Latino Amerikano i di Karibe (EU–CELAC) na
Colombia, i despues, durante e siman di 10 di novèmber, e lo partisipá na e konferensia di Nashonnan Uni tokante Kambio di Klima (COP30) na Brasil.
E tema prinsipal ku e dos promé ministernan a trata ta e situashon geo-polítiko den e region di Karibe i e posibel konsekuensianan di esaki pa Kòrsou, Aruba i Boneiru. Promé Minister Pisas a indiká na señor Schoof ku e desaroyo den e relashon aktual entre Merka i Venezuela ta kousa sierto preokupashonnan, partikularmente pa motibu
di su potensial impakto riba seguridat regional i nos turismo. Ámbos lider a akordá pa kontinuá vigilá e situashon di serka, fortifiká e liñanan di komunikashon i mantené un bon koordinashon na nivel di Reino.
Durante e reunion, Promé Minister Schoof a konfirmá tambe ku e tres paisnan Kòrsou, Aruba i Sint Maarten lo risibí un supsidio di €150 mion for di e fondo SDE++ di Hulanda. For di e montante aki, €62 mion ta destiná pa Aqualectra renová e ret di produkshon i distribushon di koriente i asina fasilitá e transishon na un sistema di produkshon i distribushon di koriente mas sostenibel. Na nòmber di Aqualectra i Gobièrnu di Kòrsou,
Promé minister Pisas a ekspresá su gratitut pa e gesto aki.
Finalmente, ámbos lider a ekspresá satisfakshon ku e reunion i a akordá pa kontinuá nan diálogo na desèmber próksimo, den márgen di un konferensia na Den Haag kaminda e otro promé ministernan den Reino tambe lo ta presente.
