Publiká riba 02 Desèmber 2025
WILLEMSTAD – djamars, 2 di desèmber 2025, Promé Minister sr. Gilmar Pisas, a risibí Embahador di India na Hulanda, sr. Kumar Tuhin.
Esaki tabata un bishita di kortesia kaminda Embahador Tuhin a bini pa introdusí su mes i pa sera konosí ku Kòrsou ku ta parti di su trabounan i pa eksplorá área di interés komún.
Durante e enkuentro Promé Minister Pisas a indiká ku Kòrsou tin gran nesesidat pa atraé mas spesialistanan mediko. Embahador Tuhin a ekspresá su disposishon pa traha huntu pa introdusí dokternan bin traha na Kòrsou. Esaki den kolaborashon ku e universidadnan mediko na Kòrsou manera Avalon University, St. Martinus University i UOC. Embahador Tuhin a enfatisá ku durante su estadia lo e tin reunion ku otro ekspertonan den e sektor di salubridat pa sigui avansá riba kolaborashon mediko i programanan akademiko.
Aparte di esei Promé Minister Pisas i Embahador Tuhin a interkambia riba temanan manera e sektor di ekonomia i turismo. Tambe a papia tokante e importansia di ‘capacity building’. E Embahador Tuhin a menshoná oportunidatnan pa personanan den sèktor públiko.
Mirando e lasonan históriko, Promé Minister Pisas i e Embahador Tuhin a reafirmá nan deseo pa intensifiká kolaborashon entre Kòrsou i India. E bishita a tuma lugá den un esfera ameno basá riba bon entendimentu i kolaborashon, pa sigui mantené un diálogo kontinuo na benefisio di Kòrsou.