Publiká riba 06 Novèmber 2025
WILLEMSTAD — 6 di novèmber 2025, Promé Minister Gilmar Pisas tabata presente na e seremonia di konmemorashon di e kaida di Brùg Reina Juliana na aña 1967. Un evento ku ta keda marká pa semper den historia di Kòrsou.
Den su diskurso, Promé Minister Pisas a rekordá ku 15 trahadó di Kòrsou a pèrdè nan bida den e tragedia aki. E la enfatisá ku kada proyekto di desaroyo mester bai kompañá pa medidanan di seguridat, pasobra progreso nunka por kosta un bida humano.
E seremonia a reuní famianan di e víktimanan, representantenan di sindikatonan, autoridatnan i ekspertonan den e mundu di seguridat den e sektor di konstrukshon. Despues ku a pone krans na e monumento, Promé Minister Pisas a duna su diskurso siguí pa diskursonan di representantenan di varios sindikato. Na final di e seremonia un subrina di un di e viktimánan tambe a konta su historia. Palabranan fuerte ku a komové e públiko.
E brùg ku nos ta mira awe, ta un símbolo di union i progreso. E ta rekordá nos tantu di e pérdida ku nos pueblo a sufri, komo e resiliensia ku nos semper ta mustra den momentunan difísil.
Promé Minister ta konfirmá su kompromiso pa sigui fortalesé kondishonnan laboral pa prevení riesgo i protehá tur persona ku ta traha den konstrukshon.