Promoshon salarial den enseñansa

Gobièrnu a kuminsá depositá e fondonan pa e promoshon di dosente di A pa B i di B pa C i asina por kumpli ku e promesa hasí na trahadónan.

WILLEMSTAD – Awe a konkluí un periodo di hopi esfuerso pa realisá un reto pa personal di enseñansa di Kòrsou ku tabata eksistí fo’i aña 2000 ku porfin na aña 2023 ta keda realisá. Personal di enseñansa komo e yabi pa edukashon i formashon di nos pais ta bai risibí nan promoshon. Komo Minister enkargá ku Enseñansa mi ta kumpli ku mi Pueblo.

Boso ta haña e promoshon di dosente di A pa B i di B pa C. Gobièrnu a kuminsá depositá e fondonan pa asina por kumpli ku e promesa hasí na trahadónan. Un grupo grandi di maestro ta haña un ahuste salarial korespondiente ku e funshon ku nan ta ehersé konforme e areglo ministerial publiká algun siman pasá. Komo ku mester tene kuenta ku diferente grupo e ahuste salarial ta tuma lugá den diferente fase durante e próksimo lunanan.

Importante ta ku komo Ministerio di Enseñansa, Siensia, Kultura i Deporte mi ta hasi mi esfuerso pa por kumpli ku henter e área di enseñansa. Dia promé di desèmber 2022, ma primintí ku 3 punto di posishon hurídiko di personal di enseñansa ta keda atendé. E punto nan ta promoshon A-B-C, ora di trabou (32-27) i vakashon pa personal no-dosente. Awe nos a atendé e promé i pronto e otro dos nan tambe ta keda atendé.

Den e próksimo lunanan tambe minister di ESKD sr. Sithree van Heydoorn lo informá tambe di e plan stratégiko ku ta e plan pa e mehorashon den enseñansa. Den e plan aki huntu ku direktivanan di skol lo bai elaborá riba e diferente aspekto mas den enseñansa ku mester mehorá.

Mi ta sigui traha huntu ku mi ministerio pa pueblo i huntu ku pueblo!

—

Sithree van Heydoorn

Minister di Enseñansa, Siensia, Kultura i Deporte

MAS NOTISIA

Ministerio konserní: Enseñansa, Siensia, Kultura & Deporte