Publiká riba 14 Mei 2022
Willemstad – Riba dianan 18 i 19 di mei próksimo ta tuma lugá aki na Kòrsou e di 10 reunion di e Komité di e Sentro di Aktividat Regional (RAC/REMPEITC-Caribe). E sentro aki ta duna training tokante polushon di laman den Karibe. Representantenan di diferente organisashon Internashonal i lokal, tantu gubernamental komo no-gubernamental, lo topa otro na e konferensia ku ta tuma lugá na Renaissance Hotèl.
E abrevishon RAC/REMPEITC- Caribe ta para pa Regional Activity Centre / Regional Marine Pollution Emergency, lnformation and Training Centre. E ta un di e kuater Sentronan di medio ambiente di Nashonnan Uní (United Nations Environment Program – UNEP). Na 1995, Gobièrnu di Kòrsou a instituí e sentro aki na Kòrsou ku ta konsistí di ekspertonan asigná pa medio di e Cartagena Convention di 1983.
Aktividatnan di e sentro ta supsidiá pa e Organisashon Marítimo Internashonal (IMO), UNEP, e Programa di Desaroyo di Nashonnan Uní (United Nations Development Program – UNDP), i Gobièrnu di Kòrsou. E meta di e sentro ta pa asistí i konsehá paisnan den Karibe riba prevenshon i redukshon di polushon di laman. Esaki ta sosodé atraves di desaroyo i evaluashon di plannan di kontingensia nashonal i multilateral, organisá training i tayer, duna sosten tékniko i konsulta, i konsientisá públiko.
E meta prinsipal di e seshonnan di e reunion ta ekstenso. Ta bai aprobá aktividat i desaroyo di añanan 2019 i 2021 den e área di polushon den laman i tambe aprobá e plan di trabou di 2022-2024 di RAC/REMPEITC-Caribe. E plan stratégiko di término largu di e sentro ta bai haña un revishon mas aktualisá pa 2022-2025. Ademas ta krea tempu pa kada organisashon presente kultivá e koperashon ku otro i sosten pa huntu sirbi e region di Karibe mas mihó.
E organisashon RAC/REMPEITC Caribe tin mas ku 25 aña na Kòrsou i ta resortá direktamente bou di Minister di Tráfiko, Transporte i Planifikashon Urbano. E ta ubiká na Edifisio Siegfried Fransisco na Seru Mahuma. Pronto e sentro ta ekspandé ku dos eksperto, unu di Trinidad & Tobago i unu di Industria Petrolero huntu ku un eksperto di US Coast Guard. Pa mas informashon tokante e sentro por bai na www.racrempeitc.org.
