Publiká riba 05 Yüli 2023
WILLEMSTAD – Den kuadro di mehorashon di nos sistema di enseñansa, Minister di Enseñansa, Siensia, Kultura i Deporte sr. Sithree van Heydoorn (ESKD) a reuní ku Sekretario di Estado, sra. Alexandra van Huffelen. Durante di e reunion a duna e mandatario dos presentashon di dos trayekto importante di ministerio di ESKD.E promé presentashon tabata riba e “Plan pa Mehorashon di Enseñansa” ku ta den konsepto. Durante di e presentashon a informá di e diferente trayektonan ku tin aktualmente. Den luna di mei a tene diferente seshon di trabou huntu ku direktiva di skolnan pa asina krea mihó komunikashon entre e ministerio i direktiva di skolnan. Den luna di yüni a tene seshonnan di Teoria di Kambio (Theory of Change), na e seshon aki tabata presente diferente stakeholders ku di un forma òf otro tin relashon i/òf ta envolví ku enseñansa. E seshonnan a keda dirigí pa sr. Sam Boering i sr. Iwan Zunder. Den transkurso di e siman aki ta tene un seshon di Teoria di Kambio pa ku nos sistema di enseñansa, ku un grupo di studiante pa por skucha nan tambe. A informá sekretaria di estado ku pronto ta kuminsá ku seshonnan pa hiba diskushon ku e diferente partnernan den enseñansa, riba e “Plan pa Mehorashon di Enseñansa” ku ta den konsepto, pa asina nan tambe duna di nan parti pa por yega na un plan definitivo. Seguidamente ta traha riba un “Road Map” pa ehekushon di e “Plan pa Mehorashon di Enseñansa”.
E di dos presentashon tabata relashoná ku e trayekto di digitalisashon di enseñansa. Fase I, di e proyekto di digitalisashon ta yegando na final i a kuminsá ku preparashon pa kuminsá ku fase II. No solamente a mustra e mandatario e plan i kiko ta tur loke ta bai sosodé den e di fase II, pero tambe a mustra un “dashboard” kaminda ministerio di ESKD por mira i hasi análisis di diferente informashon ku tin di aber ku entre otro skol, alumno i dosentenan. Un “dashboard” ta un aplikashon ku ta ilustrá informashon importante, for di diferente fuente di dato (database) ku ta duna un bista di e informashon kompilá den diferente forma. Pa asina por hasi analisá i traha rapòrtnan pa por tuma desishon na nivel di maneho basá riba dato. Sekretario di Estado Sra. A. van Huffelen a keda impreshoná ku tur e trabounan ku ministerio di ESKD a ehekutá te ainda, despues di rapòrt final di “Nulmeting”.
—
