Minister tin hopi apresio pa trahadónan di prizòn
WILLEMSTAD – Minister di Hustisia, mr. Shalten Hato, a hasi resientemente dos (2) bishita di trabou na prizòn i a ekspresá su apresio pa e labor ku e trahadónan di SDKK ta ehersé diariamente bou di kondishonnan no optimal. Na mes momento minister Hato ta mira hopi potenshal den e sentro di detenshon i korekshon.
Anteriormente minister a bishitá e instituto i a reuní ku e tim di maneho di manera ku e por a haña un splikashon di e maneho ku ta apliká den e instituto. Dianan 21 i 22 di yüli último minister Hato a bolbe bishitá SDKK. E biaha aki ela papia direktamente ku e personal ku ta enkargá ku e operashon diario dje instituto. Algun kliente dje instituto tambe a hasi uso dje oportunidat pa ekspresá nan preokupashon i sintimentu na minister.
MOTIVÁ
Durante su bishita, minister Hato a konstatá ku e trahadónan tin un grado haltu di motivashon i ta ehersé nan trabou ku hopi amor i dedikashon pa hasi e ambiente den kual nan ta traha i e ambiente dje klientenan unu mas agradabel posibel. Tambe minister Hato a tuma nota di tur e retonan ku e personal, e klientenan i e instituto ta konfrontá i huntu ku su ministerio minister a kuminsá atendé ku e retonan pa asina riba termino korto, medio i largu mira kambionan drástiko den e instituto.
Un di e areanan ku Minister Hato lo bai enfoká riba dje ta invertí den kursonan pa trahadónan i ampliashon di programanan di resosialisashon den e diferente blòknan. Na Hulanda minister Hato a hasi un bishita di trabou na e prizòn na Alphen aan den Rijn. Aki minister Hato a tuma nota kon un prizòn, ku banda di ta un sentro di detenshon i sentro di resosialisashon, por funshoná di un forma asina profeshonal ku e mes por kubri su gastunan operashonal por gran parti.
VISHON
Minister Hato ta konvensí ku un modelo asina’ki tambe ta posibel aki na Kòrsou i su vishon pa SDKK ta pa e bai funshoná komo un sentro profeshonal i bon ekipá den kual trahadónan ta sinti nan mes seif i klientenan ta risibí e guia i materialnan nesesario di manera ku ora nan sali for di e instituto di korekshon, nan ta personanan ku por reintegrá bèk den nos komunidat komo hendenan rehabilitá ku un aktitut positivo. Tambe e vishon lo enserá ku e klientenan ta siña un fishi pa nan por traha pa mantené nan mes i nan famia.
