Publiká riba 04 Ougùstùs 2022
Willemstad – Ministerio di Tráfiko, Transporte i Planifikashon Urbano (VVRP) i Servisio di Tráfiko i Transporte (UO-VV) ta informá ku e servisio na públiko pa registrashon i “overschrijving” di vehíkulo no ta optimal. Esaki ta debí na falta di personal dor di malesa i tambe vakashon.
Si un kliente aserka UO-VV pa e servisio di registrashon i/òf “overschrijving”, UO-VV ta pidi indulgensia i pasenshi debí ku e tempu di espera por ta largu. Asina ku e situashon normalisá UO-VV lo anunsiá esaki debidamente.
Pa loke ta e aspekto di kùrmentu di vehíkulo, UO-VV ke rekordá komunidat ku na momentu ku mester bini pa kùr, no ta permití un kantidat di hende den e vehíkulo. E shofùr so ta atmisibel na e momentonan ei. Tambe ta asina ku ta permití solamente personanan ku ta disponé di e papel hel ku e kliente ta risibí serka e kahera i e vehíkulo ku mester kùr, subi e tereno kaminda e edifisio di “Keuringslokaal” ta situá. E medida aki ta pa seguridat di tantu e funshonarionan komo e públiko en general.
VVRP i UO-VV ta konta ku komprenshon di un i tur i ta gradisí di antemano p’e komprenshon.