DISKURSO PA HURAMENTASHON DI PERSONAL DI SDKK
Promé ku tur kos, mi ke felisitá tur personal ku awe a presta e huramentashon ofisial komo miembro di Gobièrnu di Kòrsou. Aunke hopi di boso a sirbi SDKK durante diferente aña kaba, awe ta marka un paso importante den formalisashon di e responsabilidat ku boso a asumí pa sirbi ku honor, integridat i dedikashon. E huramentu ku boso ta hasi awe no ta simplemente un formalidat. E ta un promesa. Un kompromiso ku bo mes, ku bo koleganan, ku e organisashon i ku komunidat ku nos ta sirbi. E ta un deklarashon ku bo lo sigui hasi bo trabou ku honestidat, disiplina i rèspèt pa lei i regulashonnan.
Trabou den SDKK no ta un trabou ordinario. Ta un vokashon. Un responsabilidat grandi ku ta eksigí karakter, perseveransia i balentia. Kada dia, boso ta kontribuí na mantenementu di órden, seguridat i rehabilitashon den nos sistema korekshonal. Hopi biaha e esfuerso aki no ta visibel pa tur hende, pero e balor di e trabou ku boso ta hasi ta inmenso.
Na e okashon aki, nos kier mira tambe ku profundo rèspèt i gratitut na nos hubilarionan. Hendenan ku durante añanan a kontribuí nan talento, nan eksperensia i nan dedikashon na desaroyo di SDKK. Mas aleu mi ke honra esnan ku ya a baha ku penshun i esnan ku pronto lo sera un kapítulo importante den nan bida profeshonal. Boso a yuda forma e organisashon riba kua nos ta sigui traha awe. Boso a enfrentá desafio, a superá momentunan difísil i a laga un legado ku ta sigui inspirá e generashonnan nobo.
Nos kier gradisí boso sinseramente pa tur sakrifisio ku boso a hasi durante boso karera. Pa e dianan largu di trabou, pa e oranan èkstra, pa e kompromiso ku boso a mustra ainda den momentunan kompleho. E resultado di boso trabou ta visibel den e organisashon ku nos tin awe. SDKK no ta simplemente un edifisio òf un institushon. SDKK ta hende. Ta e hendenan ku a traha dilanti di nos i e hendenan ku ta sigui traha awe. Ta un komunidat di profeshonalnan ku ta kompartí un mesun meta: kontribuí na un Kòrsou mas sigur i mas fuerte.
E aña tin un signifikashon hopi speshal. Na luna di mart último, SDKK a selebrá su aniversario di 66 aña. Durante mas ku seis dékada, SDKK a bira un institushon importante i respetá den nos komunidat. E reputashon aki no a bin di mes. E a ser gana pa medio di trabou duru, perseveransia i dedikashon di míles di empleadonan ku a pasa pa e organisashon durante e añanan.
Sesenta i seis aña di servisio ta representá un historia riku di kresementu, adaptashon i kompromiso ku nos mishon. E ta representá tambe e kontribushon di kada miembro di personal, for di e generashonnan ku a kaba nan servisio te ku e generashon aktual ku ta sigui karga e antorcha. Miéntras ku nos ta honra nos pasado, nos mester mira tambe na futuro. E futuro di SDKK lo sigui dependé di e kalidat, profeshonalismo i dedikashon di su personal. E futuro lo dependé di liderazgo fuerte, di trabou den ekipo i di un kompromiso kontinuo ku mehorashon.
Na tur personal ku awe ta hasi presta nan huramentashon, mi kier bisa: sigui sirbi ku orguyo. Sigui hasi bo trabou ku dignidat. Sigui ta un ehèmpel di integridat i profeshonalismo. Boso ta representantenan di un institushon ku tin un papel esensial den nos sosiedat. Na nos hubilarionan, mi kier bisa: DANKI. Danki pa boso servisio. Danki pa boso kompromiso. Danki pa e legado ku boso ta laga atrás. Aunke boso ta sera un kapítulo profeshonal, semper lo tin un lugá speshal pa boso den historia di SDKK.
Ku Dios bendishoná tur miembro di SDKK, tur famia relashoná ku e organisashon i nos kerido isla di Kòrsou.
Masha danki.
