Sinku asistente di kuarto di operashon nobo ta fortalesé sektor di kuido na Kòrsou - Informashon tokante Gobièrnu di Kòrsou

Sinku asistente di kuarto di operashon nobo ta fortalesé sektor di kuido na Kòrsou

Salubridat Públiko, Medio Ambiente i Naturalesa
 

Sinku asistente di kuarto di operashon nobo ta fortalesé sektor di kuido na Kòrsou

Publiká riba 01 Yüli 2026

WILLEMSTAD – Durante e seremonia di entrega di diploma, Minister di GMN, Tyron Boekhoudt, a felisitá e graduadonan i a enfatisá ku invertí den profeshonalnan di salú ta un di e pilarnan prinsipal pa un sistema di salú sostenibel.

E sinku asistente di kuarto di operashon nobo lo kontribuí direktamente na oumentá kapasidat di e kuartonan di operashon i na mehorá kalidat i aksesibilidat di kuido pa nos komunidat. Nan graduashon ta un resultado konkreto di e invershonnan kontinuo den edukashon i desaroyo di personal di salú lokal.

“Tur profeshonal den sektor di kuido ku nos forma ta un invershon den futuro di Kòrsou. Awe nos no ta selebrando solamente sinku diploma, pero tambe sinku profeshonal ku lo yuda fortalesé kuido di salú pa nos pueblo,” segun minister Boekhoudt.

E minister a rekonosé ku sektor di salú ta enfrentando diferente reto, manera falta di personal i un demanda di kuido ku ta sigui oumentá. Pa e motibu aki, Ministerio di GMN ta sigui un strategia integral, kaminda ta invertí tantu den forma talento lokal komo den atraé speshalistan médiko den e area nan kaminda nos tin skarsedat.

Den e kuadro ei, Minister Boekhoudt ta sigui traha den kooperashon internashonal, inkluyendo ku institushonnan médiko na Colombia. E kolaborashon aki ta enfoká riba atraé médikonan speshalisá den area nan kaminda Kòrsou tin falta di ekspertisio. Ku trese e speshalistanan aki pa Kòrsou, tambe ta krea mas oportunidat pa profeshonalnan lokal apliká nan konosementu i sigui desaroyá nan mes.

Minister Boekhoudt ta gradisí tur e institushonnan di enseñansa, dosente i profeshonalnan di kuido di  salú ku a kontribuí na formashon di e grupo nobo di asistente di kuarto di operashon.

E graduashon di e promé grupo aki ta marka un paso importante den e vishon di minister Boekhoudt pa sigui fortalese nos sistema di salú, redusí tempu di espera i sigui traha riba un sektor di kuido aksesibel i sostenibel pa nos pueblo.