Publiká riba 29 Mei 2026
WILLEMSTAD, 28 DI MEI – Komo Gobièrnu di Kòrsou, ku hopi atenshon nos a sugui e desaroyonan geopolítiko di último lunanan na medio oriente i e influensia di esakinan riba nos pais. E efekto mas grandi sin duda ta e subida di kosto di bida ku ta afektando nos pueblo.
Asumiendo nos responsabilidat komo Gobièrnu, a tuma e desishon pa implementá un pakete di medida pa mitigá e efekto di e oumento di kosto di bida riba e gruponan mas vulnerabel den nos komunidat. E sosten aki ta konsistí di un pago mensual di Xcg 100 o un pakete di kuminda pa e esnan ku ta kumpli ku e kondishonnan stipulá. 6 grupo lo risibí e sosten aki ku tin un durashon di en prinsipio 3 luna.
Komo Ministerio di Desaroyo Sosial, Labor i Bienestar, nos tambe lo aportá na sosten di algun grupo di enfoke den nos komunidat manera klientenan ku ta risibí ònderstant, siudadanonan ku ta risibí un kompensashon riba nan AOV, benefisiarionan di AWW, i algun grupo mas.
Pa mas informashon i aplikashon pa risibí sosten, bishitá: https://sosten.gobiernu.cw
Komo Gobièrnu, nos ta keda traha konhuntamente pa sigui vigilá e situashon i sostené e habitantenan mas vulnerabel di Kòrsou.
