Spich di Minister di Enseñansa na apertura di aña Eskolar 2026 – 2027

Dama i kabayero, nos alumnonan, mayornan, maestronan, personal no dosente, direktornan y tur ku di un forma of otro ta traha den nos sistema di enseñansa,

Awe nos ta habri huntu e aña eskolar 2026–2027. Un aña nobo yen di oportunidat, ambishon y momentunan kaminda nos mucha nan lo krese, deskubrí y desaroyá tur talento ku nan tin. Kada aña eskolar ta un kuminsamentu nobo, un aña kaminda no solamente nos ta mira dilanti, pero tambe nos ta tuma paso konkreto pa hasi nos enseñansa mas fuerte, mas inklusivo y mas kla pa futuro.

• Enseñansa ta e base riba kua Kòrsou ta konstruí su futuro.
• Ta e maestro ku tur dia ta para dilanti ku dedikashon.
• Ta e mucha ku ta yega skol ku kuriosidat y ta sali ku konfiansa.
• Ta e mayor ku ta apoyá, ta kere den su mucha y ta traha huntu ku skol.
• Y ta e komunidat ku ta komprendé ku invertí den enseñansa ta invertí den nos isla mes.

E aña eskolar aki nos ta sigui tuma paso pa fortalesé kalidat di nos enseñansa. Nos ta invertí den formashon profeshonal, material moderno, skol mas sigur y un relashon mas fuerte entre skol, kas i komunidat. Pasobra kada mucha meresé un skol kaminda e ta sinti ku e ta mira, e ta tende y e ta wòrdu stimulá pa krese.

Mi ke tuma un momentu pa papia spesialmente tokante nos enseñansa spesial. E parti aki di nos sistema di enseñansa ta un fuente di kreatividat, balentia i forsa. Nos alumnonan den enseñansa spesial ta mustra nos tur dia kiko perseveransia ta nifiká. Nan meresé enseñansa ku ta apoyá nan, ta stimulá nan i ta laga nan bria.

P’esei awe mi kier kompartí ku bosnan un momentu hopi importante den nos sistema di enseñansa spesial;

Dia 28 di ougùstùs próksimo, den un seshon públiko di Parlamento, lo wòrdu trata e Lès di Enseñansa Spesial.

Esaki ta un paso fundamental pa modernisá, rekonosé y fortalesé enseñansa spesial na Kòrsou. Ta un señal ku nos, ta skohe pa inklushon, pa oportunidat igual y pa un sistema kaminda kada mucha sin importansia su reto of limitashon i kaminda e mucha tin derechi riba enseñansa di kalidat ku ta konektá ku su nesesidatnan.

Esaki no ta solamente un paso di polítika; ta un eskoho sosial.

Un eskoho pa humanidat, pa hustisia y pa futuro di nos mucha nan i pa huntu nos  konstruí futuro pa nos sistema di enseñansa spesial.

Maestronan, boso ta e motor di nos sistema di enseñansa. Den bosonan nos ta pone futuro di Kòrsou. Mi ta gradisí boso pa boso esfuerso, boso pasenshi y boso amor pa e profeshon.

Mayornan, boso ta nos partner. Enseñansa ta traha solamente ora skol y kas ta traha huntu. Mi ta invitá boso pa sigui kontribuí, pensa huntu y konstruí huntu.

Y na nos alumnonan: e aña aki ta di boso. Soña grandi, purba, krese. Kòrsou ta kere den boso.

Ku orguyo, konfiansa y determinashon, mi ta deklará aña eskolar 2026–2027 ofisialmente habrí.

Laga nos traha huntu pa ku e aña aki bira un aña kaminda kada mucha, sin importá su situashon sosial, talento of reto tin oportunidat pa floresé.

Un bon aña eskolar pa tur hende.

Masha danki.

MAS NOTISIA

Ministerio konserní: Enseñansa, Siensia, Kultura & Deporte