Publiká riba 20 Sèptèmber 2026
Siman pasá tabatin un insidente grave ku a tuma lugá na un skol unda un studiante a saka un kuchú durante un pleitu ku un otro alumno. Un maestro ku a bai intervení pa stòp e situashon a resultá heridá. E insidente ta pone un biaha mas énfasis riba e importansia di un ambiente di skol sigur pa kada alumno i kada profeshonal di enseñansa.
Ministerio di Enseñansa, Siensia, Kultura i Deporte (ESKD) a intensifiká su atenshon riba siguridat na skolnan despues di e insidente. Den e proseso aki lo traha riba e maneho eksistente i si ta nesesario lo aselerá i intensifiká e medidanan.
Ta bon pa informá ku skolnan lo keda habrí djaluna.
Skolnan na Kòrsou lo keda habrí djaluna 21 di sèptèmber i edukashon lo kontinuá. Ministerio ta respetá e derechi di trahadónan pa organisá i ekspresá nan preokupashonnan.
Minister i su ministerio ta den kontakto direkto ku direktivanan di skol. Si resultá ku e reunion general ku SITEK a organisá pa djaluna mainta, kondusí na falta di personal, direktivanan di skolnan ta tuma e medidanan apropiá pa duna guia na alumnonan.
Debí na e situashon di urgensia ku a presentá, sindikatonan SITEK i DOEN a risibí un invitashon pa un kòmbersashon urgente riba djamars 22 di sèptèmber pa 2or na Fort Amsterdam, tokante seguridat na skol. Minister di Hustisia, pero tambe vise promé minister, minister di Desaroyo Sosial, Trabou i Bienestar i di forma virtual minister di Enseñansa, Siensia, Kultura i Deporte lo ta presente na e kombersashon aki.
Siguridat na skol ta eksigí un aserkamentu amplio.
Siguridat na skol ta eksigí un maneho amplio i struktural. E ministerio ta trahando riba diferente medidanan, entre otro e korte di hóbennan, training den ‘herstelcirkels’ i koperashon entre skol i “buurtregisseurs “. E reakshon rápido i adekuá di polis riba e último insidente ta konfirmá e importansia di e kolaborashon aki. Na mes momento lo revisá e medidanan di seguridat eksistente, ku atenshon spesial pa situashonnan di violensia grave òf uso di arma òf otro ophetonan peligroso.
Atenshon intensifiká i akshon konkreto.
E siman aki lo tin un enkuentro inter-ministerial ku e ministernan i instansianan relevante pa determiná medidanan konkreto riba término korto. Ademas, e plan di seguridat eksistente lo wòrdu implementá di un forma rápido i lo reforsá esaki kaminda ta nesesario. Tambe lo revisá e protokòlnan relashoná ku insidentenan di violensia grave y uso di arma of otro opheto peligroso. E konsekuensianan pa alumnonan ku ta trese arma òf otro artefaktonan peligroso na skol, òf ku ta pone alumnonan òf personal den peliger, ta ser evaluá atrobe. Kaminda ta nesesario, lo reforsá e medidanan. Mester ta kla pa kada alumno ku e tipo di komportashon aki ta pasa un liña di toleransia serio i ministerio lo sigurá ku esaki lo tin konsekuensianan kla i apropiá den kuadronan ku lei ta duna.
Kòrda ku ta trata di un kaso penal.
E insidente ta suheto di un investigashon kriminal. Si e echo i sirkunstansianan ta duna motibu, esakinan por kondusí na un akshon penal. E desishon aki ta keda den man di outoridatnan hudisial kompetente pa evaluá esaki.
Skolnan Sigur ta un responsabilidat ku nos ta tuma na serio. Ministerio ta asumí su responsabilidat den esaki dor di aselerá i intensifiká medidanan di seguridat eksistente, kaminda ta nesesario, i sigui traha kontinuamente na un ambiente di skol sigur pa kada alumno i profeshonal di enseñansa.
