Publiká riba 30 Òktober 2023
WILLEMSTAD,- Minister di Hustisia, mr. Shalten Hato, meskos ku Fundashon pa Konsumidó ta di opinion ku mester ankra den lei un proseso na Korte di Hustisia, kaminda e konsumidó por akudí fásil, lihé i e mester ta pagabel, na momento ku e konsumidó ta di opinion ku no ta respetá su derechi. Resientemente Minister di Hustisia, Shalten Hato, i un delegashon di Ministerio di Desaroyo Ekonómiko a reuní ku Fundashon pa Konsumidó tokante e tema “protekshon di e konsumidó”.
Fundashon pa Konsumidó pa añanan kaba ta luchando pa adaptá nos leinan pa asina yega na un prosedura den Korte ku ta fásil i pagabel pa konsumidónan, di manera ku nan por eksihí i haña un desishon di Korte pa imponé pa e komersiante kumpli ku su deber pa ku e konsumidó. E konsumidó por pidi pa e komersiante pag’é un suma, por ehèmpel si el a disolvé e akuerdo di kompra, pero tambe e por pidi pa remplasá un produkto òf drecha un produkto. Esaki ta e kaso si despues di kompra di por ehèmpel un wasmashin òf frishidèr, e produkto resultá di ta defisiente. Na e momentu ei e konsumidó por eksigí di e komersiante pa drecha òf remplasá e produkto akí. Si dado kaso e komersiante no ta dispuesto pa hasi esaki, e konsumidó por disolvé e akuerdo di kompra i eksigí su sèn bèk.
Komo Minister di Hustisia, responsabel pa nos estado di derecho i ku ta para pa derecho di tur konsumidó, a uni su mes na e trayekto akí i a komprometé su mes pa terminá ku un konsepto di lei.
E konsepto di lei akí ta garantisá akseso na Korte, hasiendo uso di un proseso apropiá pa kasonan di konsumidó, na un tarifa muchu mas abou.
Proseduranan na Korte por dura largu i por ta kompliká i gastunan mará na un prosedura den Korte ta haltu, sigur kompará ku preis di kompra di un produkto (por ehèmpel un wasmashin) òf servisio (servisio di drecha auto).
Un di e benefisionan ku probablemente e adaptashon di lei akí lo trese kuné, ta ku kalidat di produkto- i servisionan na Kòrsou lo subi. Esaki sigur lo ta na bienestar di henter komunidat. Pasó al final di dia: Nos tur ta konsumidó!
