Publiká riba 02 Novèmber 2023
Willemstad – Minister di Desaroyo Ekonómiko, Ruisandro Cijntje, ta sumamente satisfecho ku e impakto di turismo riba nos ekonomia pa loke ta trata e promé 3 kuartalnan di 2023. E kontribushon proyektá di 2.245 mion florin na nos ekonomia, ta suprayá e vishon ku Minister Cijntje tin pa loke ta trata e desaroyo di turismo di Kòrsou, ku no solamente ta enserá oumento di kantidat di turistanan di estadia, turistanan krusero i nan gastunan direkto, sino tambe un industria inklusivo, ku ta inkluí desaroyo di sektornan suplidó di turismo, empresarionan lokal i komunidat den su totalidat.
MEO ta ferwagt ku turismo, e pilar ekonómiko prinsipal di Kòrsou, lo tin un kontribushon hopi positivo riba Kòrsou su Produkto Interno Bruto (GDP) pa aña 2023, meskos ku na 2022. Aña pasá esaki tabata un kontribushon di 35% na nos Produkto Interno 
Bruto. Minister Cijntje ta kere firmemente ku mester sigui diversifiká merkadonan niche, manera deporte- i eko-turismo, MICE i turismo di evento, turismo di barku di bela i yate, i turismo médiko i bienestar (medical and wellness tourism). Banda di esaki e lo perkurá pa sigui invertí den kapasitashon di personal di hospitalidat i horeka i tambe desaroyo di seguridat, limpiesa, transportashon i hasi nos produkto mas bunita.
Stimulá e konsepto di ‘experential tourism’ tambe ta yuda pa konektá turismo ainda mas ku komunidat. Esaki ta pèrmití nos turistanan meskla i sera konosí mihó ku nos hendenan lokal i eksperensiá mas di nos historia kultural, kreatividat i gastronomia. Ya nos por mira varios di e desaroyonan aki na Boca Samí, Otrabanda, i algun área di Banda Abou, Nieuw Nederland i Seru Fortuna. Tambe nos ta enfoká pa hasi e sektornan ku ta suplidó na nos ekonomia mas kompetitivo, di forma ku nan tambe por krea mas empleo i retené mas entrada for di loke turistanan ta gasta. Esaki lo krea oportunidat pa mas empresanan mikro, chikí i mediano establesé den e sektor di turismo.
Minister Cijntje ta realístiko i ta mira tambe adelantá, retonan ku kresementu den e sektor di turismo lo trese kuné. Esaki lo rekerí pa hasi ahustenan nesesario na entre otro kantidat di buelonan, akomodashon, áreanan turístiko, playanan, i tráfiko pa nos pais tin e kapasidat pa akapará e kresementu ku nos ta proyektá pa ku e industria. Ademas, minister ta kere den mas inovashon i introdukshon di modelonan finansiero nobo den turismo pa hasi e industria poko poko mas outo-sufisiente. E kresementu di e industria mes i oumento di 2% di e impuesto pa kamber pa turistanan (di 7% pa 9%) lo yuda nos finansiá e invershonnan aki. Minister Cijntje, ta hopi agradesido pa e trabounan i esfuersonan inkansabel di e stakeholdernan den e sektor di turismo pa engrandesé e sektor di turismo i ta sigui konta riba kada un su kolaborashon i sosten. Huntu nos ta lográ implementá e plan stratégiko di destinashon di turismo aktual pa Kòrsou ku a keda aprobá dor di konseho di Minister ku e meta pa un kresementu sostenibel, inklusivo i resiliente di turismo i ekonomia di Kòrsou.
