Desishonnan di djárason 14 di desèmber 2022

Desishonnan relashoná spesífikamente ku asuntunan di pais riba nivel nashonal di djárason, 14 di desèmber 2022:

1. Konseho di Minister ta bai di akuerdo ku petishon di Minister di Desaroyo Sosial, Labor i Bienestar pa kambio den presupuesto relashoná ku kompra di dos (2) vehíkulo pa Sektor di Inspekshon di Asuntunan di Labor. Esaki aplikando artíkulo 47, insiso 3, di e ‘Landsverordening Comptabiliteit 2010’ i konforme konseho di Direktor di Sektor di Maneho Finansiero i Maneho di Presupuesto di dia 15 di novèmber 2022.

Ministerio(nan) responsabel: Ministerio di Desaroyo Sosial, Labor i Bienestar.

---

2. Konseho di Minister a tuma nota di e karta ku Minister di Tráfiko, Transporte i Planifikashon Urbano a entregá na Minister di Medio Ambiente, Urbanisashon i Kambio di Klima di Turkia riba 30 di novèmber 2022, tokante postulashon di sr. Albert Martis komo kandidato pa e posishon di Sekretario General pa “World Meteorological Organization” (WMO) durante e periodo 2024-2027.  

Ministerio(nan) responsabel: Ministerio di Tráfiko, Transporte i Planifikashon Urbano.

---

3. Relashoná ku e proposishon di Minister di Salubridat, Medio Ambiente i Naturalesa di dia 9 di desèmber 2022 tokante normanan di kalidat i e plan di ehekushon pa e bishitanan di kalidat ku tin ku tuma lugá bou di kuido di dòkternan di kas, Konseho di Minister ta bai di akuerdo ku e siguiente puntonan:

1. Establesé e normanan di kalidat pa kuido di dòkternan di kas na Kòrsou di Picus Expertise, “Commissie Kwaliteitsvisitatie Huisartsenzorg” i “Curaçaose Huisartsenvereniging” (CHV) di dia 21 di novèmber 2022;
2. Establesé e plan di ehekushon pa e bishitanan di kalidat ku tin ku tuma lugá bou di kuido di dòkternan di kas na Kòrsou (mei 2022) di e ‘Commissie Kwaliteitsvisitatie Huisartsenzorg’, kual ta enserá:
   • legalisá e bishitanan di kalidat di dòkternan di kas na Kòrsou;
   • lanta un “Órgano” enkargá ku preparashon di un reglamento di bishitanan di kalidat i ehekushon di tur trabou relashoná ku esaki;
   • Kuminsá implementá e bishitanan di kalidat entrante 1 di yanüari 2024;
   • Duna mandanto na CHV pa nombra un komishon di ekspertonan riba tereno di Kalidat ku – den konsulta ku kompañeronan di mesun profeshon i e órgano ehekutivo – mester stipulá, sigui desaroyá i ahustá un sistema di norma i balorashon.
3. Implementashon di e Plan di ehekushon entrante 1 di yanüari 2023. 

Esaki konforme proposishon di Minister di Salubridat, Medio Ambiente i Naturalesa di dia 9 di desèmber 2022.

Ministerio(nan) responsabel: Ministerio di Salubridat, Medio Ambiente i Naturalesa.

---

4. Konseho di Minister ta bai di akuerdo ku kontenido di e kosepto di lei pa por trese kambio den e lei tokante kompetensia i e lei di penshun pa ámtenar. Konseho di Minister tambe ta bai di akuerdo pa presentá e lei den konsepto akí na Parlamento pa keda tratá.

Esaki konforme konseho di Direktor di Lei i Asuntunan Hurídiko di dia 7 di desèmber 2022. 

Ministerio(nan) responsabel: Ministerio di Desaroyo Ekonómiko.

---

5. Konseho di Minister ta bai di akuerdo pa hasi entrega di e konsepto di lei tokante hungamentu di wega di number na Konseho Sosial Ekonómiko pa risibí konseho. Esaki konforme petishon di Minister di Finansa di dia 12 di desèmber 2022.

Ministerio(nan) responsabel: Ministerio di Finansa.

---

6. Konseho di Minister ta bai di akuerdo ku kontenido di e plan di maneho “Barika yen, Kòrsou kontentu. Economisch perspectief van voedselzekerheid gericht op de groei van landbouw en veeteelt” inkluso plan den etapa (stappenplan), pa yega na ehekushon di e programa piloto i tambe e diferente puntonan di akshon deskribí den e plan. 

Esaki konforme petishon di Minister di Desaroyo Ekonómiko i di Minister di Salubridat, Medio Ambiente i Naturalesa di dia 9 di desèmber 2022.

Ministerio(nan) responsabel: Ministerio di Desaroyo Ekonómiko i Ministerio di Salubridat, Medio Ambiente i Naturalesa.