Agènda di ehekushon komo paso nobo den koperashon entre Hulanda i Kòrsou - Informashon tokante Gobièrnu di Kòrsou Bo opinion

Notisia

Agènda di ehekushon komo paso nobo den koperashon entre Hulanda i Kòrsou

Geplaatst op 01 February 2021 dor di Ministerio Asuntunan General i Promé Minister

Hulanda huntu ku Kòrsou a traha un agènda di ehekushon pa ehekutá e asina yamá ‘Landspakket’. Den e pakete akí tin diferente medida ku ta enfoká riba reforsá e estado di derecho i drecha e maneho finansiero, di impuesto, di kuido, i den enseñansa.

Dia 2 di novèmber 2020 Hulanda i Kòrsou a firma e akuerdo pa ehekushon di e ‘Landspakket’. Den e último simannan a yega na diferente palabrashon pa loke ta e promé pasonan ku Kòrsou, sostené pa Hulanda, ta bai dal. E pasonan akí ta parti di e promé agènda di ehekushon.

E agènda di ehekushon akí mester kontribuí na e resistensia i resiliensia di un ekonomia i komunidat duradero. Un ekonomia i komunidat ku ta mas mihó kapas pa atendé ku krísis, oportunidatnan nobo, i perspektiva pa siudadano i kompanianan. Por ehèmpel ta hasi un estudio profundo di e maneho empresarial i klima di invershon pa por yega na pasonan konkreto pa reforsá e dinámika di ekonomia lokal ku ta hiba na mas oportunidat di trabou. Tambe ta hasi mesun tipo di investigashon di e kondishonnan laboral den sektor públiko, pa por yega na un maneho kualitativo i un organisashon gubernamental pagabel.

Tantu Kòrsou i Hulanda a komprometé pa dal e pasonan manera a palabrá. E agènda di ehekushon ta konsistí di akshon i proseduranan di trabou enfoká riba resultadonan konkreto ku ta keda adaptá segun ta bai. Esaki na promé instansia ta sosodé kada kuartal i lo konektá esaki ku toma di desishon di Konseho di Minister di Reino tokante mas sosten pa likides.

Sekretario di Estado Knops ta kontentu ku awor a traves di e agènda di ehekushon, ta duna kontenido konkreto na e reformanan nesesario. “Despues di firmamentu di e akuerdo mi a indiká ku awor e trabou mes ta bai kuminsá. E agènda di ehekushon akí ta yuda nos ku esaki i ta forma di e manera akí e ruta basá riba palabrashonnan konkreto’.

Promé Minister Rhuggenaath: “Nos Gobièrnu ta hopi kontentu ku di e forma akí ta dal pasonan konkreto i asina rápido despues di a yega na un palabrashon ku Hulanda. No ta tur akshon den e agènda di ehekushon ta nobo, pero si hopi nesesario; nos ta bai ehekutá nan awor, a traves di un koperashon intensivo huntu ku tur instansia gubernamental konserní i demas envolví, den un organisashon transparente i enfoká riba akshon!”

“Ku e agènda di ehekushon akí a dal e siguiente paso pa,  huntu ku Hulanda,  sali mas fuerte for di e krísis ekonómiko, ku un bon balansa entre reforma i invershonnan nesesario den nos ekonomia i nos komunidat. Ku atenshon pa e koherensia sosial. Ya pa e aña akí nos lo kuminsá mira e frutanan di e trabou”, segun Promé Minister Rhuggenaath.

Ministerio konserní