Publiká riba 02 Novèmber 2020
Gobièrnu di Kòrsou i di Hulanda a yega na un akuerdo polítiko ku otro riba e di 3 transh pa sosten di likides 2020. Den e akuerdo aki a logra realisá un koperashon multilateral di vários aña ku e obligashon pa kumpli kabalmente kuné.
E Gabinete di Hulanda ta duna nan sosten di likides a kambio di e reformanan nesesario pa adelanto di Kòrsou. Ademas, ta bai invertí tambe den múltiple área di desaroyo di Kòrsou. Di e manera aki Hulanda ta komprometé di sostené Kòrsou riba e reformanan struktural i duradero ku tin ku tuma lugá. Aparte di e sosten finansiero pa e presupuesto di Kòrsou ku tin défisit a konsekuensia di e vírùs di Corona, ta bai duna sosten ku konosementu i eksperensia. Pa e motibu aki ta lanta e Órgano Karibense di Reforma i Desaroyo (mihó konosí komo COHO), ku huntu ku e Ministerionan na Kòrsou i den konsulta ku ‘stakeholders’, lo traha riba e reformanan nesesario. E órgano ta yuda den implementashon di esaki tambe. COHO no ta tuma e responsabilidat di Parlamento i Gobièrnu di Kòrsou i su órganonan di implementashon. Esaki a keda aksentuá i akordá den e deliberashonnan i e akuerdo ku a yega na dje. Sinembargo, COHO ta supervisá e implementashon di e reformanan struktural i atribuí konsekuensia na esaki si tin falta di kumplimentu.
Ku e akuerdo aki Hulanda ta pone adishonal un total di 30 mion euro disponibel pa infrastruktura di enseñansa, 25.3 mion euro pa mehorá estado di derecho i un máksimo di 20 mion euro pa drecha e klima di invershon i hasi negoshi pa medio di un instrumento di garantia ku mester ta efektivo i fásil pa logra. Tur esaki ta invershonnan ku ta kontribuí na un desaroyo ekonómiko duradero ku ta krea kupo di trabou. En partikular, e mehoransa di e klima di invershon, di hasi negoshi i akseso fásil na finansiamentu, lo ta importante pa e mundu empresario i rekuperashon ekonómiko.
Promé Minister Rhuggenaath: “E situashon na Kòrsou ta un reto, pero na mes momento ta ofresé perspektiva. Nos ta asumí nos responsabilidat i bai pa e retonan ku ta warda nos, pero nos énfasis ta bai mas bien riba e oportunidatnan ku esaki ta brinda nos ya ku Kòrsou tin un potensial sosial ekonómiko grandi. Kòrsou no por logra esaki su so ainda, pero nos ta bai traha pa yega einan”.
Sekretario di estado Knops: “Ku e pakete di medidanan aki lo bai traha riba e reformanan struktural ku ta bai hasi tantu e ekonomia komo komunidat di Kòrsou mas duradero i resistente. Banda di e reformanan tin espasio tambe pa invershonnan pa e pais. Kòrsou mester sali fuerte for di e krísis aki i para riba su propio pia, pasó e siudadanonan di Kòrsou meresé un perspektiva sosial i ekonómiko. Pues e akuerdo polítiko aki ta un promé stap importante. Esaki te rekerí esfuerso kontinuo di tur hende na Kòrsou.
Klek riba e siguiente link pa un kopia di e: Onderlinge regeling landspakket Curacao incl SM (versie 2 november).
