Publiká riba 02 Òktober 2020
Kerido pueblo,
Danki pa un bia mas permití mi informá boso di e desaroyonan rondó di e kombersashonnan ku nos a bin ta hiba ku Hulanda, pa yega na un akuerdo pa un finansiamentu i kolaborashon duradero.
Ku satisfakshon mi por raportá awe ku nos a sigui logra avansenan signifikativo den e negosashon ku Hulanda. Un bia mas, e negosashonnan no tabata fásil. E trabou ta duru i e materia hopi biaha ta kompliká, pero e trabou duru durante e último simannan dor di ámbos pais ta dunando fruta. A hasi hopi esfuerso pa ámbos banda komprondé otro i mas aun komprondé e posishon i nesesidatnan di Kòrsou.
Asina a diskutí en ekstenso riba e pakete di reforma (landspakket). Huntu ku esaki a añadí un agènda di ehekushon. Den esaki bon kla a definí e ophetivonan ku Hulanda ke mira nos logra, pero mas importante ta ku a definí e loke nos mes ke mira realisá.
E agènda aki lo keda determiná huntu, esta den kolaborashon di un tim di Hulanda i unu di Kòrsou. Lo duna kontenido tokante e reforma i invershonnan ku tei tuma lugá pa esakinan por sirbi interes di e pueblo di Kòrsou mihó. Nos a logra tambe pa e pakete no bira un pakete di reforma so, pero tambe di invershon den nos desaroyo ekonómiko i desaroyo sosial. Den e totalidat akí Hulanda lo duna espasio pa Kòrsou presentá un ‘business case’ pa proyektonan di invershon adishonal.
Asina so nos por krese di bèrdat pa medio di renobashon i invershon duradero. Tin mas punto ku a keda kubrí, pero manera indiká anteriormente nos no por divulgá tur kos miéntras e negosashonnan ta andando.
A deliberá tambe, en ekstenso, riba e Lei di Reino, Rijkswet Caribisch Hervormingsentiteit i su “memorie van toelichting”. Sumamente importante den esaki ta pa reiterá un bia mas ku un di e puntonan di mas importante ta pa nos outonomia keda salbaguardiá.
Konseho di Minister, den su último reunion, a haña presentashon di e pakete di reforma (landspakket) i a duna nan komentario riba loke e tim tékniko a proponé. Kombersashonnan riba nivel tékniko a kontinuá riba e Lei di Reino, nos ta spera ku esaki tambe por konkluí den e próksimo dianan. Ku un akuerdo polítiko riba e kontenido di e pakete kompleto, esaki lo por ser tratá den Konseho de Minister di Reino. Pa despues e Lei sigui den e trayekto di konseho na ‘Raad van Staten’ i nos ‘Raad van Advies’ pa finalmente bai Parlamento pa tratamentu. Miéntras tantu e finansiamentu ku nos mester por ta na nos disposishon i e kolaborashon ku Hulanda por inisiá.
Mi ke gradisí komunidat pa e madures i pasenshi den e último simannan, pa e espasio duná, pa e negosashonnan por a kontinuá.
Awor ta e momentu pa nos tuma akshon, pa bienestar di nos tur! No tin mas márgen pa keda bira rònt. E ora a yega pa nos uni i pone nos pais bèk riba e ruta di rekuperashon. Lo no bai ta fásil. E kaminda ainda ta largu, pero nos tin urgensia. Nos mester realisá reformanan ku pa hopi tempu nos a bin ta diskutí, pero nunka no a konkretisá. Nos mester tuma e kurashi i realmente invertí den loke semper nos tabata sa ku lo hasi nos grandi; esta, nos hendenan! Tur esaki, enfrentando un di e krísisnan ku a dal nos mas duru den nos historia, pero nos lo haña nos kaminda pa sali for di dje.
Ta di e forma aki so, ku kabes friu pero ku gran ambishon i determinashon, nos tá logra éksito.
Masha danki.
