E JVO di 14 di yanüari 2021 entre e ministernan di Hustisia di Korsou, Aruba, Sint Maarten i minister di Hustisia i Seguridat di Hulanda tabata un konsulta eksitoso. - Informashon tokante Gobièrnu di Kòrsou Bo opinion

Notisia

E JVO di 14 di yanüari 2021 entre e ministernan di Hustisia di Korsou, Aruba, Sint Maarten i minister di Hustisia i Seguridat di Hulanda tabata un konsulta eksitoso.

Geplaatst op 17 January 2021 dor di Ministerio Hustisia

Hustamente den tempu di krísis ta di sumo importansha, pa den Reino nos sigui  traha bon i konstruktivamente ku otro. Dia 14 di yanüari último, e ministernan di Hustisia i Seguridat sr.Grapperhaus (di Hulanda inkluso Karibe Hulandes),  sr.Bikker (Aruba), sr.Girigorie (Curacao) i sra Richardson (Sint Maarten) a reuní tokante koperashon di e 4 paisnan riba tereno hudisial. Riba invitashon di minister Bikker di Aruba, minister Girigorie a biaha pa Aruba pa partisipá na e konsulta aki. E otro ministernan a partisipá virtualmente na e konsulta i Sekretario di Estado pa Asuntunan Interno i Relashonnan di Reino sr.Knops tambe tabata presente i a  partisipá durante tratamentu di algun punto.

Durante di e JVO aki a trata sierto puntonan importante ku na opinion di minister di Hustisia di Kόrsou ta bon pa keda tresé dilanti.

Protekshon di datonan i interkambio di informashon

Den e lucha kontra kriminalidat ta importante pa e paisnan pa medio di protekshon sόlido di datonan por interkambiá informashon di forma rápido ku otro. Pa e motibu aki e ministernan a yega na akuerdonan pa garantisá ku e protekshon di datonan ta wόrdu reglá di forma uniforme. Tambe a elaborá kon pa desaroyá e sentronan di informashon di e islanan mas mihό.

Interkambio di konosementu i ekspertisio

E kalidat di e Ministerionan Públiko tambe ta haltu riba e agènda di e paisnan. A yega na akuerdonan tokante formashon anual di fiskalnan lokal (di e islanan) i tokante estudio di Lei na e paisnan, di forma ku esnan ku kaba nan estudio na universidat di Aruba i Kòrsou lo por tin akseso igual na selekshon i formashon pa e profeshon di abogado, hues i fiskal na Hulanda. E palabrashonnan ta promové e interkambio di e profeshonalnan aki entre paisnan i ta kontribuí na kalidat i diversifikashon di e profeshonnan ya menshoná.

Uniformidat den Lei di prosedimentu penal

E Lei di prosedimentu penal ta kontené reglanan tokante e forma kon Polis i Ministerio Públiko por detektá infrakshonnan i e forma ku huesnan mester aktua ora di tomo di desishon.

Modernisashon di e Kódigo di prosedimentu penal den e tres paisnan i Karibe Hulandes lo hasi e proseso penal mas efisiente i lo duna e víktimanan mas derecho. E mesun reglanan ta keda apliká pa Polis i Ministerio Públiko den tur pais Karibense di Reino den kaso di investigashon di delitonan penal. Huesnan tambe por apliká mesun reglanan ora di dikta sentensia den e kasonan aki. Pa e motibu aki a yega na e akuerdo pa e kódigonan tin mesun kontenido i drenta na vigor pareu.

Fortifikashon di e Estado di derecho

A elaborá riba e parti di “landspakket” ku ta regardá fortifikashon di e Estado di derecho. Ku ehekushon di e medidanan aki e kuater paisnan a sòru pa un bon komienso. Strukturalmente Hulanda ta pone un kantidat kresiente te ku 45 mion euro disponibel pa fortfiká e Estado di derecho di e paisnan Karibense di Reino.

Koperashon pa ku kombatimentu di kriminalidat ku ta traspasá frontera.

Minister di Hustisia di Kòrsou a enfatisá ku di akuerdo ku rapòrtnan konserní, ta opvio ku e konekshon ku Hulanda ta forma un peliger i ta un riesgo pa e paisnan Karibense, pa motibu ku e demanda for di Oropa pa droga, spesialmente di parti di Hulanda, ta haltu. Kòrsou ta fungi komo pais di tránsito entre Sur Amerika i Hulanda, i netamente pa e motibu aki ta importante, pa Hulanda invertí debidamente den fortifikashon di partikularmente e servisionan di informashon na Kòrsou.

Koperashon ku RST

E JVO ku aprobashon a tuma nota di e “beheerplan” (plan di gestión )  “ presupuesto 2021 i e “meerjarenraming” ( kalkulashon multianual ) 2022-2025 di RST.  Na Kòrsou aktualmente tin un bon koperashon entre e timnan desentral di RST ku a base di e protokol nobo ta traha estrechamente huntu ku e otro partnernan den kadena hudisial bou di liderazgo di KPC.

E meta di e konsulta ministerial entre e ministernan di Hustisia di e 4 paisnan di Reino ku ta tuma lugá kada 6 luna, ta kordinashon di e enfoke di e paisnan pa ku asuntunan hudisial ku nan tin en komun.

Minister di Hustisia sr.Girigorie ta hopi satisfecho ku e logronan riba e tereno di koperashon den Reino pa loke ta trata Hustisia i Seguridat.

 

Ministerio konserní