E promé fase di formashon sosial ‘Un Komienso Nobo’ a inisiá. - Informashon tokante Gobièrnu di Kòrsou

Notisia

Ministerio konserní Hustisia
 

E promé fase di formashon sosial ‘Un Komienso Nobo’ a inisiá.

Publiká riba 16 Mart 2022

Trayekto di koperashon entre Defensa Ulandes i Gobièrnu di Kòrsou

Willemstad – Dia 1 di mart último, Defensa Ulandes a inisiá e promé fase den e trayekto di formashon sosial.  E trayekto akí ta forma parti di e proyekto ‘Un Komienso Nobo’. ‘Un Komienso Nobo’ ta un proyekto di Gobièrnu di Kòrsou den koperashon ku Defensa Hulandes pa brinda un oportunidat nobo na nos hóbennan entre 18 pa 24 aña ku no a kaba nan estudio òf a bini den kontakto ku hustisia.

E promé fase di e proyekto akí a inisiá na Marine Kazerne Suffisant ku un grupo piloto di 18 hóben. Den un periodo di 4 luna e hóbennan aki lo bai siña, den un konteksto militar, norma i balornan manera entre otro disiplina, outoestima, rèspèt propio, kon bira mentalmente fuerte i kon karga responsabilidat. Tantu di parti di Defensa komo Gobièrnu a apuntá lidernan den e proyekto akí tantu enkargá ku e promé i e di dos fase di e trayekto ku lo ta e asina yamá ‘Leerwerktrajekten’(LWT).

Di parti di Defensa Hulandes, e hóbennan partisipante lo pasa den un trayekto di formashon sosial i un organisashon eksterno lo ta enkargá ku e parti di e trayekto pa e hóbennan por siña un fishi di un forma práktiko, oumentá nan kapasidatnan i brinda e hóbennan un perspektiva pa futuro. Na final di e proyekto, e hóbennan lo ta prepará pa un trabou ku ta kuadra ku e nesesidatnan riba merkado laboral na Kòrsou. Durante e di dos fase, ta e intenshon pa e hóbennan regresá un biaha pa luna na Defensa pa repasá e norma i balornan ku nan a siña den fase 1.

E proyekto ‘Un Komienso Nobo’ ta keda ehekutá den kuadro di un akuerdo entre Kòrsou i Hulanda pa ku reformanan den ‘Landspakket’. Dia 1 di desèmber 2021, Konseho di Minister a akordá e plan di akshon pa e proyekto ‘Un Komienso Nobo’ i na yanüari 2022 Hulanda tambe a akordá esaki. Ministerio di Hustisia, Ministerio di Desaroyo Sosial, Labor i Bienestar, Ministerio di Enseñansa huntu ku Defensa Hulandes ta e partnernan den e proyekto aki. 

E dos mannan ku bandera di Kòrsou i Hulanda ta representá e kolaborashon entre e dos paisnan ku ta karga e proyekto. E tres pòpchinan ta simbolisá e kursistanan ku ta saka man pa alkansá Un Komienso Nobo. E logo a wòrdu diseñá dor di Defensa Ulandes i despues di algun adaptashon chikí aprobá dor di Stuurgroep Interministerial.