Publiká riba 28 Mei 2023
WILLEMSTAD – Un punto importante den e ‘Programa di Gobernashon 2022-2025: Riba kaminda pa rekuperashon i mihó kalidat di bida pa pueblo’ ta pa tèkel e diferente desafionan ku aparato gubernamental ta enfrentá riba tereno di servisio i atendé ku e problemátikanan sosial grandi ku pais konosé. Den e kuadro akí a kuminsá na 2022 ku un trayekto ku entretantu a resultá den un plan ku ta kontené un kantidat di proposishon di mehorashon E proposishonnan akí mester resultá den un funshonamentu duradero i mas mihó di gobièrnu den su totalidat, ku un balor agregá pa servisio interno i eksterno komo tema prinsipal. Den e trayekto akí Gobièrnu – ku Minister di Maneho di Gobernashon, Planifikashon i Servisio Públiko, Sr. Ornelio Martina, komo Minister responsabel – un biaha mas a tuma un kantidat di paso importante den e trayekto akí.
Aña pasá a kuminsá un investigashon tokante funshonamentu di gobièrnu. A studia hopi rapòrt tokante kon e aparato gubernamental a bin ta funshoná for di e periodo 2010 – 2022. A tene más di shentisinkuenta kombersashon profundo i entrevista ku mandatario i funshonarionan públiko di e nuebe ministerionan. Stakeholdernan eksterno tambe a partisipá na e interkambionan i kombersashonnan. E trayekto akí a resultá den e rapòrt “Niets doen is geen optie meer!” (Hasi nada no ta un opshon más!). E rapòrt ta kontené proposishonnan di mehorashon pa e struktura mas haltu, direkshon i organisashon di e ministerionan, repartishon di ròl i responsabilidat entre e minister i funshonnan mas haltu di gobièrnu, servisio interno i eksterno, maneho i kòntròl di prosesonan di trabou den ministerionan i koperashon interministerial. Riba 30 di novèmber 2022, Konseho di Minister, en prinsipio, a bai di akuerdo ku e proposishonnan di mehorashon den e rapòrt.
Durante e periodo tras di lomba, Konseho di Minister a tuma un kantidat di desishon preparatorio importante den e direkshon ei. Por kuminsá redaktá propuestanan pa adaptashon nesesario di lei i reglanan den kuadro di e proposishonnan di mehorashon. Ta informá lidernan di proyekto tokante e prinsipionan fundamental di e rapòrt ku proposishonnan di mehorashon kualnan ta keda na base di, anto vigente, pa otro proyektonan den ehekushon originando for di e Programa di Gobernashon i Pakete Pais ku tin konsekuensianan organisashonal. Tambe ta tene konsulta ku “Centraal Georganiseerd Overleg in Ambtenarenzaken” (CGOA) pa yega na akuerdo tokante un kuadro di maneho sosial pa kambionan den e aparato públiko. Ademas, pa garantisá un implementashon eksitoso di e proposishonnan di mehorashon den e lunanan benidero lo traha na organisashon di e programa “Verbeteren Functioneren Overheid” (VFO). E programa akí ta kai bou di responsabilidat di Minister Martina (BPD), kende ta haña sosten di un grupo di guia ministerial ku tin tres otro minister tambe aden. Esakinan ta minister di SOAW, sra. Larmonie-Cecilia, Minister di VVRP, sr. Cooper i Minister di OWCS, sr. Van Heydoorn.
E programa VFO tin komo meta yega na un reforma duradero di funshonamentu di empleadonan públiko den funshonanan haltu den e ministerionan i mehorá funshonamentu en general di aparato gubernamental. Den esaki ta pone énfasis riba servisio interno i eksterno i maneho operashonal di ministerionan. Trabou ta tuma lugá pa mehorá servisio na públiko i kompanianan dor di, entre otro, establesé un lokèt di pèrmit efisiente i ku ta aksesibel den mas ku un forma pa atendé ku tur pregunta i produkto di gobièrnu. Tambe ta enfoká riba sigui avansá ku digitalisashon di servisio. E programa akí ta kubri tur e nuebe ministerionan i ta konektá ku palabrashonnan entre gobièrnunan di Kòrsou i Hulanda pa ehekushon di e Pakete Pais Kòrsou.
Minister Martina tin konfiansa ku e kaminda ku a tuma lo resultá den un organisashon di gobièrnu efisiente, efektivo i nivel haltu di diligensia ku kalidat i kapasidat esensial pa konvertí maneho den resultado.
