Gobièrnu ta duna státus relashoná ku kondishonnan mará na di dos transh
Publiká riba
01 Sèptèmber 2020
WILLEMSTAD – Konforme petishon di Hulanda, Gobièrnu di Kòrsou a entregá 31 di ougùstùs último un karta na Kolegio di Supervishon Finansiero (Cft) indikando státus di e pasonan ku a tuma lugá den e periodo tras di lomba, pa kumpli ku e kondishonnan di Hulanda mará na e di dos transh di sosten finansiero. E karta ta duna un bista general, pero informativo di kon leu Gobièrnu a yega i tambe kiko ta e pronóstikonan finansiero pa e tempu benidero.
Puntonan importante ku a bin dilanti den e karta:
- Gobièrnu di Kòrsou for di aprel 2020 a bin ta duna sosten na personanan ku a pèrdè trabou tantu promé komo despues di 15 di mart di e aña aki. Esaki Kòrsou a bin ta hasi ku su propio fondonan, sin sosten di Hulanda. Gobièrnu den e kaso aki por garantisá pago na e grupo aki te ku fin di sèptèmber awor, kual lo monta un total di 6 luna ku a logra duna sosten.
- Entrante 1 di yüli 2020 a introdusí e rebaho riba pakete laboral di mandatario i parlamentarionan. Mester ankra esaki awor den un lei. E proseso pa logra esaki ya ta kanando i e konsepto lo keda presentá na ‘Raad van Advies’, pa despues e bai Parlamento na luna di òktober ku tur probabilidat.
- Pa loke ta trata redukshon di 12.5% di e pakete laboral di empleadonan di sektor públiko, Konseho di Minister ya a aprobá e konsepto di lei kual lo mester keda presentá na Parlamento mas pronto posibel.
- Intenshon tambe ta pa kombertí e Dekreto Ministerial publiká riba 13 di mei – ku ta trata salario di funshonarionan haltu ku mester adaptá konforme e salario nobo di Promé Minister – den un konsepto di lei. E konsepto di lei aki tambe lo presentá na Parlamento na luna di òktober. Mientrastantu e Dekreto Ministerial lo keda vigente. A base di esaki a kalkulá ademas e tarifanan redusí pa consultants, kual Konseho di Minister tambe a aprobá.
Den e karta Gobièrnu a presentá alabes su ‘business case’. Esaki ta enserá tambe konseho (“second opinion”) di CMC. Ademas di esei a entregá relato anual di tur kompania di Gobièrnu ku Cft a rekerí.
Di e forma aki Gobièrnu di Kòrsou ke demostrá ku e ta kumpli ku su palabrashonnan ku Reino Hulandes i un bes mas di ta serio den ehekushon di su plan pa rekuperá e situashon sosial-ekonómiko di Kòrsou i sigui konstruí pais. A base di esaki Gobièrnu ta spera di por kontinuá e kombersashonnan ku Hulanda, pa finalmente yega na un akuerdo fiho ku ta benefisiá pueblo di Kòrsou.
