Notisia

WILLEMSTAD – Entrante 1 di yüni 2020 skolnan ku tin aprobashon di Brigada di Higiena por habri bèk. Kada skol mester informá e alumno i mayor di e programa i roster (orario) ku e alumno mester sigui na skol. Den kuadro di e medidanan di higiena relashoná ku COVID-19 kada skol ta keda responsabel pa su propio protokòl di higiena i mester tene su mes na e instrukshonnan di prekoushon ku Gobièrnu a indiká.

Durante e último simannan direktivanan di skol, skolnan i maestronan a traha duru pa realisá e trabounan pa e re-apertura di enseñansa por tuma lugá di un forma responsabel. Gobièrnu di Kòrsou a fasilitá tambe dor di buta fondonan adishonal disponibel pa por kubri gastunan adishonal den kuadro di higiena i mantenshon. Direktivanan, skolnan pero tambe shofurnan di bùs eskolar a risibí instrukshon (indikashon) pa Enseñansa por kuminsá bèk teniendo kuenta ku e ‘Normal Nobo’ na skolnan i a partisipá den seshonnan di informashon. Enseñansa na kada skol ta kuminsá na momento ku nan tuma e medidanan relashoná ku limpiesa i higiena i a haña aprobashon di e Brigada di Limpiesa. Den sierto kasonan esaki por bai den fase den e skolnan, dependé di e tipo di enseñansa. E programa i roster (orario) lo keda komuniká na mayor i alumnonan.

Pa resumí ta informá ku entrante 1 di yüni 2020:

1. Skolnan di Fundeshi ta kuminsá;
2. Skolnan di Enseñansa práktiko dirigí riba merkado laboral (AGO) ta kuminsá konforme un programa adaptá;
3. Enseñansa na skolnan independiente di formashon básiko (onderbouw VSBO) por kuminsa;
4. Enseñansa na tur klasnan ku no ta último aña di enseñansa avansá (VO) por kuminsá basá riba planifikashon individual di e skol i teniendo kuenta ku e kapasidat pa aloká e alumnonan konforme e normal nobo;
5. Enseñansa na alumnonan ku no ta den e aña final di enseñansa sekundario (SBO) por kuminsá basá riba nan planifikashon individual di e skol i teniendeo kuenta ku e kapasidat pa aloká alumnonan konforme e norma nobo;
6. Kada skol ta informá e alumno i mayor di e programa i roster(orario) ku e alumno mester ta na skol;

Último dia di skol pa aña eskolar 2019/2020 ta riba dia 10 di yüli 2020.

MAS NOTISIA

Ministerio konserní: Enseñansa, Siensia, Kultura & Deporte