Notisia

WILLEMSTAD- Konseho di Minister den su reunion di 7 di òktober 2020, a bai di akuerdo pa nombra 10 miembro di Konseho Kultural Kòrsou. E Konseho Kultural tin komo meta pa konsehá Gobièrnu den e sentido mas amplio di palabra pa ku área kultural di nos pais. Asina nan ta kontribuí ku konseho komo eksperto i profeshonal pa promové i stimulá e koperashon entre e aktornan di diferente ekspreshon kultural di Kòrsou.

Dia 8 di òktober último a tuma lugá instalashon di e miembronan di Konseho Kultural Kòrsou. E miembronan ta: Ir. Michael A. Newton (Presidente), Roland (Roy) Colastica, Prof. Dr. Ashley Duits, Sharelly Emanuelson MA Artistic Research, Drs. Hereswit Verele Engels, Mr. Karel Frielink, Drs. Shulaika (Su) Girigorie, Drs. Carel de Haseth, Andrey Pichardo MBA i Raygen Zuiverloon.

Na aña 1977 a kambia e nòmber di Culturele Adviesraad den Konseho Kultural Kòrsou. A instalá Culturele Adviesraad Curaçao den aña 1968 pa e aktual Bestuurscollege. Konseho Kultural Kòrsou tabata e órgano enkargá prinsipalmente ku supervishon i hurado pa e Premio Cola Debrot. Tambe Konseho Kultural Kòrsou a emití diferente konseho na Gobièrnu riba tereno kultural durante último añanan. Mirando e último desaroyonan riba tereno kultural, Konseho Kultural Kòrsou a hasi un petishon na Gobièrnu pa amplia su tareanan i Gobièrnu di Kòrsou a honra e petishon aki.

Konseho Kultural Kòrsou a haña komo tareanan adishonal:
1. Duna Konseho na Gobièrnu solisitá i no solisitá ku respekto na tur aspekto di kultura den e sentido mas amplio di palabra i ku ta konserní tur asuntu kultural;
2. Señalá desaroyo importante riba tereno kultural;
3. Kumpli ku e funshon fundamental pa ta e laso entre e diferente disiplina kultural i aktua komo plataforma pa e sektor kultural di nos isla;
4. Kontribuí na e maneho kultural di Gobièrnu i promové i stimulá e koperashon entre e aktornan di diferente ekspreshon kultural di Kòrsou;
5. Konsehá Gobièrnu en kuantu nominashon ganadónan Premio Cola Debrot, Premio Willem C.J. (Boeli) van Leeuwen i Premio Charlwin (Broertje) Marshall.

Por tuma kontakto ku Konseho Kultural Kòrsou via di e presidente ku ta sr. Michael Newton na michael@newton.cw òf telefon 510-6978.

Gobièrnu di Kòrsou ta felisitá e miembronan i ta deseá nan tur klase di éksito ku e tareanan importante aki.