Komienso Èksamennan Final Sentral 2021 VSBO, HAVO, VWO - Informashon tokante Gobièrnu di Kòrsou Bo opinion

Notisia

Komienso Èksamennan Final Sentral 2021 VSBO, HAVO, VWO

Geplaatst op 10 May 2021 dor di Ministerio Enseñansa, Siensia, Kultura & Deporte

WILLEMSTAD – Despues di un periodo di preparashon largu i intensivo, 1.903 kandidato pa èksamen di 18 skol di Kòrsou (2019: 2.205) ta kuminsá ku nan èksamen sentral final pa VSBO, HAVO i VWO. Djaluna 10 di mei 2021 ta kuminsá e periodo di èksamen sentral final di Enseñansa Avansá pa 444 kandidato pa HAVO i 149 pa VWO. Èksamennan VSBO ta kuminsá djárason 12 di mei 2021 pa 1.310 kandidato di kua 348 ta di VSBO-PBL, 400 VSBO-PKL, i 562 VSBO-TKL. Miéntras ku èksamennan práktiko sentral PBL i PKL ya a kuminsá kaba riba 21 di aprel 2021.

Durante mas ku tres siman kandidatonan pa èksamen na Kòrsou ta traha nan èksamen ku ta determiná si nan a sera nan periodo na VSBO, HAVO òf VWO ku éksito. Na momentu ku esaki sosodé eksitosamente, hopi ta sigui ku un estudio na un instituto di enseñansa mas avansá adekuá, sea lokalmente òf na otro pais.  E kantidat di mas grandi di studiantenan ta bini di enseñansa profeshonal sekundario preparatorio (VSBO). E aña akí ta di 17 biaha ku tin èksamennan final pa VSBO. Den VSBO ta hasi distinshon entre tres trayekto edukativo: PBL (Trayekto edukativo Profeshonal Práktiko), PKL (Trayekto edukativo Práktiko pa formashon di Kader) i TKL (Trayekto edukativo Teóriko pa formashon di Kader).

Pa motibu di e pandemia di Covid-19, no tabatin èksamen final sentral na 2020. P’esei ta hasi aki un komparashon ku aña 2019. E grupo di kandidato di mas grandi ta pasa èksamen TKL, esta 562, 158 ménos, kual ta un bahada supstansial kompará ku aña 2019. Pa PKL esaki ta 400, un bahada di 31 kompará ku aña 2019 i PBL 348, 13 mas ku 2019. Na total tin 14 skol VSBO na Kòrsou ku ta pasa e èksamen final. Kompará ku aña 2019 e kantidat di kandidatonan pa èksamen HAVO ku e aña akí ta pasa èksamen final na Kòrsou ta hopi ménos, esta 444 kompará ku 560 na 2019, ku ta 116 ménos. Pa VWO tin 149 kandidato ku ta pasa èksamen final e aña akí, kual ta 100 ménos ku aña 2019. E kantidat total di skolnan HAVO ku ta pasa e èksamennan final ta 7 i di nivel VWO 6.

Roster pa èksamennan sentral:

Pa HAVO i VWO e èksamennan di promé periodo ta kuminsá djaluna 10 di mei 2021 ku e èksamen sentral Hulandes. VSBO pa e trayekto edukativo di TKL ta kuminsá djárason 12 di mei 2021 ku e èksamennan sentral Atministrashon & Komèrsio, Hospitalidat, Téknika General i Kuido & Bienestar. E promé periodo di èksamen pa VSBO ta finalisá djamars 1 di yüni 2021 ku e èksamen sentral Spañó pa tantu PBL, PKL komo TKL. Pa HAVO i VWO e promé periodo di èksamen ta finalisá djaluna 31 di mei 2021 ku respektivamente e èksamen sentral Kímika, Ekonomia di Empresa i Maneho & Organisashon.E di dos periodo, esta repaso di èksamen, e èksamennan práktiko VSBO ta tuma lugá den e periodo di 14 pa 23 di yüni 2021. Pa èksamennan sentral teorétiko final VSBO, HAVO i VWO, e di dos periodo ta di 14 pa 25 di yüni 2021. I e di tres periodo e aña akí ta  mas trempan ku normal, esta di 5 pa 9 di yüli 2021. Pa mas informashon di e roster: Roster Eksamen Final pa VSBO, HAVO , VWO 2021.

Resultado èksamennan final: 

ETE ta responsabel tambe pa fiha e normanan di e èksamennan. Esaki ta tuma lugá basá riba un método sientífiko. Pa mas tardá 10 di yüni 2021 ta manda e normanan pa e promé periodo di èksamen pa tur skol. Ta manda e normanan di e di dos i di tres periodo respektivamente djabièrnè 2 di yüli 2021 i djaweps 15 di yüli 2021.

Liña di èksamen ETE: 

Pa reakshon i opservashon tokante e èksamennan, ETE tin un liña di èksamen. A organisá e liña di èksamen segun grupo di vak i e ta intenshoná pa skol, kandidato i otro interesadonan. Pa medio di e liña di èksamen por raportá problema i hasi opservashon i remarke tokante e èksamennan. Naturalmente por raportá reakshonnan general tambe tokante èksamennan. E liña di èksamen-ETE ta registrá i ordená tur e notifikashonnan segun grupo di vak, ku despues profeshonalnan di konstrukshon di èksamen di ETE ta atendé ku e koutela nesesario. Dependiendo di e tipo di notifikashon, ta atendé esaki direktamente durante òf despues di e periodo di èksamen. E liña di èksamen ta alkansabel den e periodo di èksamen na e number di telefòn general 434-3710 òf 434-3737. Tambe por manda reakshon na e e-mail adrès helpdesk@ete.cw.

Sentro di Ekspertisia pa Prueba & Èksamen (ETE) i e kolaborashon entre paisnan den Reino

Sentro di Ekspertisia pa Prueba & Èksamen (ETE), e organisashon ehekutivo den Ministerio di Enseñansa, ta responsabel pa entre otro, konstrukshon, tradukshon, produkshon, distribushon i determinashon di normanan pa Èksamennan Sentral Final pa Enseñansa Avansá. ETE ta produsí un total di 116 èksamen VSBO pa aña (promé i di dos periodo) i 28 èksamen pa HAVO i VWO (promé i di dos periodo). Produkshon di èksamen ta kuminsá mas ku 1,5 aña delantá. Èksamennan ku ta bini for di Hulanda, ta prinsipalmente èksamennan pa HAVO i VWO. Di un kantidat di èksamen vmbo-gl-tl (=vsbo tkl) ku ta bini for di Hulanda ta hasi un ‘screening’ delantá pa loke ta un konteksto adekuá.

E trabou ku ETE ta hasi ta unu di hopi presishon i eksaktitut ku ta tuma lugá den kuadro i planifikashon estrikto. Apesar di e posishon independiente di e otro paisnan den Reino ta eksistí ainda un kolaborashon ku Hulanda i St. Maarten riba tereno di e èksamennan sentral. Tantu pa Boneiru i Sint Eustatius komo pa St. Maarten, ETE ta entregá te ainda (for di 10-10-10 basá riba un akuerdo di servisio) e èksamennan sentral pa enseñansa avansá ku ETE ta desaroyá. E kantidat di èksamen e aña akí ta hopi ménos pa motibu di introdukshon di e lei di enseñansa hulandes riba e asina yamá islanan BES. E aña aki pa promé biaha e èksamen di Geografia HAVO i VWO a keda konstruí a base di un koperashon mutuo ku e 4 paisnan den Reino. Tambe ETE ta tradusí èksamen na papiamentu (algun èksamen lokal i sierto èksamen for di Hulanda) pa PBL, PKL i TKL di e skol SKAIH (e úniko skol ku tin Papiamentu komo idioma di instrukshon). Pa Sint Maarten, ETE ta hasi tradukshon na ingles pa PBL i PKL di un kantidat di èksamen lokal. Riba wèpsait di ETE por konsultá e èksamennan bieu i modelonan di korekshon. Tambe for di e aña akí por download despues di èksamen e modelonan di korekshon di e promé periodo di e èksamennan konstruí pa ETE, for di www.ete.cw.

Eksamennan final i e vírùs di Corona: 

E aña akí tambe e vírùs di Corona tin un impakto gandi riba enseñansa. Minister di Enseñansa, Siensia, Kultura i Deporte pa e motibu akí a tuma un kantidad di medida pa sostené enseñansa, evaluashon i eksaminashon mas mihó posibel. Den liña grandi ta trata di ménos èksamen sentral pa VSBO, èkstra repaso, pa HAVO/VWO no konta un vak no esensial i pa tur nivel tin adaptashon di norma ora ta nesesario. Ku esaki Minister ta spera ku studiantenan lo eksperensiá ménos daño di e impakto di e pandemia di Corona. Finalmente Minister di Enseñansa, Siensia, Kultura i Deporte i e tim di Sentro di Ekspertisia pa Prueba & Èksamen (ETE) ta deseá tur kandidato di èksamen forsa i hopi éksito ku nan èksamennan final.

******************************************************

 

Ministerio konserní