Publiká riba 04 Yüni 2021
WILLEMSTAD – Dia 26 di mei último Konseho di Minister a disidí pa pidi konseho serka Konseho di Konsulta riba e konsepto di lei “Landsverordening waarborging integriteit (kandidaat-)ministers”. E konsepto di lei tin komo meta pa revisá e reglanan pa screening di kandidatonan konsiderá pa bira minister. E konsepto tambe ta revisá e reglanan pa salbaguardiá integridat di gobernashon durante e periodo di un gabinete.
E konsepto ta trahá a base di e rekomendashonnan di e Komishon di evaluashon ku a duna su rapòrt final riba 7 di òktober 2020. Den e konsepto tambe a tene kuenta ku e rapòrt di Transparency International di 2013 i e Tratado internashonal kontra korupshon (UNCAC). E konsepto ta sigui e lei ku tin aktualmente, ku kambio i artikulonan adishonal a base di e rekomendashonan di e Komishon di evaluashon, e rapòrt di Transparency International i e tratado di Nashonnan Uní kontra korupshon.
Den e fase akí Konseho di Konsulta mester duna su konseho riba e konsepto di lei. Por lo general, Konseho di Konsulta ta duna su konseho dentro di tres luna. Si kambionan grandi mester tuma lugá, lo presentá esakinan na Konseho di Konsulta di nobo pa despues e bai Parlamento, pa medio di e Gobièrnu ku ta bai asumí poder.
