Publiká riba 13 Yanüari 2023
WILLEMSTAD – E kuater paisnan den Reino a yega na un “Hoofdlijnenakkoord”.
Durante di e último dos dianan ku a pasa tabatin diskushonnan konstruktivo riba kon e paisnan den Reino ke sigui traha huntu den Reino. E paisnan ke traha a base di un kolaborashon riba igualdat, apropiashon i konfiansa mutuo. Esaki lo kuadra ku e manera kon kada país ta mira un futuro komun. Un kolaborashon ku tin di kondusí na implementashon di reformanan ku ta kontribuí na resilensia i un desaroyo sostenibel di e paisnan.
E posishon di e kuater paisnan den Reino a keda kompartí den un ambiente ámeno.
Esaki a demostrá un biaha mas e importancia di e reformanan establesí den e paketenan di país (landenpakket). E propósito di e kombersashonnan aki tabata pa logra akuerdonan nobo riba e forma ku lo bai organisá e koperashon den e implementashon di e paketenan di país.
A logra pa yega na un “Hoofdlijnenakkoord” riba un areglo mutuo. E regulashon aki lo remplasá e propuesta di konsenso di e lei di Reino COHO (Caribisch Orgaan voor Hervorming en Ontwikkeling). E lei di Reino COHO ya a keda presentá den Parlamento i “Tweede Kamer” i a risibí un respuesta krítiko riba esaki.
Aruba, Sint Maarten i Kòrsou a tuma e inisiativa i a presentá un propuesta nobo ku a keda diskutí durante di e último dos dianan aki. Ophetivo tabata pa yega na un akuerdo mutuo den kual entre otro ta establesé akuerdonan riba e método di traha, e método di raportá, e apoyo di parti Hulanda i e durashon di e akuerdo. I e fórmula akí lo krea siguridat pa ku e relashonan di igualdat den Reino.
Durante di e último dos dianan a traha tensamente pa realisá e akuerdonan akí. E akuerdonan lo keda deskribí mas detayá pa e ekípo profeshonal den futuro próksimo. Ta spera ku lo firma un akuerdo final mutuamente na prinsipio di luna di mart 2023.
E kuater paisnan den Reino a akordá tambe ku e konsultanan, riba e fiansanan ku Hulanda a hasi durante di e temporada di COVID i ku lo vense dia 10 di òktober 2023, lo inisiá den luna di febrüari 2023.
Ademas a diskutí riba e asuntunan pendiente ku ta enserá e prosidimento di solushon riba asuntunan di kontroversia (geschillenregeling). E paisnan lo spera riba e deliberashonnan di Parlamento i “Tweede Kamer” riba esaki.
A diskutí tambe riba e tema di défisit demokrátiko. Den kuadro di esaki e paisnan a akordá pa organisá un konferensia di Reino.
