Publiká riba 10 Febrüari 2022
D.r.p.d.: Djurick Comenentia (Kabinetschef Minister-president), Lennard Nijenhuis (TWO), Jennifer Fer (Directrice WJZ), Caroline Fiévez (Secretaris Bestuur van Jurdoc), Minister president Gilmar Pisas, Flora Goudappel (Voorzitter Bestuur van Jurdoc), Rick Buijs (Directeur Jurdoc), Carlien de Wit Hamer (Adj, Directeur Jurdoc), Roxiënne Albertina (Beleidsmedewerker)
Willemstad – Ministerio di Asuntunan General di Kòrsou, ta risibí sosten finansiero den forma di un supsidio for di Hulanda den kuadro di realisashon di e asina yamá GT-Project. E abreviashon akí ta para pa ‘Project Geconsolideerde Teksten’. E proyekto akí ta forma parti di e ‘Landspakket’ i e Agènda di Ehekushon mará na esaki. Den e proyekto akí ta e intenshon pa kombertí tekstonan legislativo i eventual kambionan ku a keda hasí den kurso di desénas di aña na e struktura polítiko aktual di e pais. Ku otro palabra, ta bai kombertí e tekstonan konserní den tekstonan mas kontinuo pa di e forma akí nos legislashon na Kòrsou bira mas komprendibel i transparente.
Tin un gran nesesidat pa tekstonan konsolidá di tantu lei komo reglamentunan di Kòrsou. For di 10 di òktober 2010, Gobièrnu di Kòrsou a risibí e tarea pa formulá e tekstonan konsolidá akí a base di e Areglo di transishon general ‘wetgeving en bestuur Land Curaçao’. Na momento ku nos a optené nos status di pais outónomo den Reino Hulandes, a keda determiná ku e lei i reglamentunan di tantu Kòrsou komo teritorio insular i esnan di e Pais Antia Hulandes lo a keda na vigor den e Pais Kòrsou (nobo). Esaki, ku eksepshon di un kantidat mínimo di reglamentu. E traspaso akí ta nifiká pues, ku e lei i reglamentunan vigente tambe mester a keda adaptá na e situashon nobo di Pais Kòrsou; esta wòrdu konsolidá.
Pa por realisá e proyekto akí, a aserká Stichting Juridische Documentatie (JurDoc) pa yuda aktualisá i konsolidá un kantidat di masoménos 850 reglamentu. JurDoc ya ta disponé di datonan (digital) di e reglamentonan legal vigente i e konosementu i eksperensia nesesario den formulashon di tekstonan di tantu lei komo reglamentunan konsolidá i kontinuo.
Tambe por menshoná, ku e kódigonan legal manera nos Kódigo Sivil (Burgerlijk Wetboek), Kódigo Penal (Wetboek van Strafrecht) i Kódigo di Enhuisiamentu (Wetboek van Strafvordering) ya a keda kombertí den tekstonan kontinuo dor di JurDoc. Na e momentunan akí, JurDoc ta trahando riba formulashon di masoménos 40 reglamentu pa Kòrsou. Ta trata aki di reglamentunan ku tantu ministerionan komo Órden di Abogadonan i otro ‘stakeholders’ a indiká ku tin gran nesesidat na e momentunan akí pa e tekstonan en kuestion keda konsolidá.
Aparte di esaki, e GT-Project ta enserá tambe e optimalisashon di e banko di legislashon digital riba wjz.gobiernu.cw. Den e banko di legislashon akí, tur lei i reglamentu di Kòrsou ta disponibel elektrónikamente pa un i tur.
Gobièrnu Hulandes a pone un supsidio di 360.00 euro disponibel pa realisashon di e GT. Project. E proyekto ta kai bou di liderazgo di Direktorado di Lei i Asuntunan Hurídiko (WJZ) di e Ministerio di Asuntunan General. Tantu e Minister di Asuntunan General, sr Gilmar Pisas, komo e tim di maneho di e direktorado ta sumamente agradesido pa e kolaborashon fruktífero ku a bin ta tuma lugá ku tur e diferente partnernan konserní.E tim tras di e proyekto, ta sumamente motivá pa e proyekto akí kana di forma eksitoso di moda ku finalmente tur lei i reglamentu di Kòrsou por ta aksesibel pa tur persona.
