Márgen riba ganashi pa produktonan higiéniko no ta algu nobo - Informashon tokante Gobièrnu di Kòrsou Bo opinion

Notisia

Márgen riba ganashi pa produktonan higiéniko no ta algu nobo

Geplaatst op 01 September 2020 dor di Ministerio Desaroyo Ekonómiko

WILLEMSTAD- Teniendo kuenta ku un oumento den e demanda pa produktonan di kuido, higiena i limpiesa a konsekuensia di e pandemia di COVID-19, Gobièrnu di Kòrsou a introdusí un regulashon di preisnan máksimo riba e kategoria di produktonan aki. E regulashon a keda introdusí na luna di mart di e aña aki i ta trata un márgen (porsentahe) máksimo di ganashi i no un preis fiho ku Gobièrnu ta stipulá pa e produktonan aki.

Gobièrnu di Kòrsou ta keda konsiderá di sumo importansia pa, meimei di e sirkunstansianan aktual, pueblo di Kòrsou tin akseso liber i hustu na produktonan ku e por tin mester pa protehá su mes i su famia. Den un esfuerso pa yuda protehá e konsumidó di posibel abusu di preis pa loke ta trata e kategoria di produktonan aki, Ministerio di Desaroyo Ekonómiko (MEO) a kondusí un evaluashon di e merkado i entrante 19 di mart 2020 a introdusí un márgen máksimo di ganashi riba e siguiente kategoria di produktonan:

  • Hanskun tantu di latèks komo tambe di silikón;
  • Produkto pa desinfektá man;
  • Spray pa desinfektá;
  • Wipes antibakterial;
  • Alkohòl pa limpia (70% òf mas)
  • Tèrmometer i
  • Tapa-boka (mondkapjes c.q. mondmaskers)
  • Diferente fruta i bèrdura ku ta kontené un dósis haltu di vitamina C.

Introdukshon di un márgen máksimo no ta nifiká ku Gobièrnu a stipulá e preis ku e komersiante (por mayor òf detal) mester bende kada produkto. E márgen mas bien ta stipulá ki porsentahe di ganashi e komersiante tin mag di tin riba kada kategoria di produkto. For di investigashon a mustra ku esaki ta e manera mas hustu pa apliká e kontrol mirando ku kada komersiante ta kumpra e produkto na un preis diferente. Introdukshon di un preis fiho lo resultá bentahoso pa algun i malu pa otro ku kisas ta kumpra e produkto na un preis mas haltu. Mas ku klaro esaki por nifiká tambe ku den un establesimentu e preis di un produkto por ta diferente for di e otro. Ta na kada konsumidó na unda e ta skohe pa hasi su kompra.

Tur e diferente kategorianan di produkto huntu ku e márgen máksimo di ganashi ku a keda stipulá pa Gobièrnu, ta keda indiká detayadamente den e areglo ministerial (P.B. 2020 no. 17, P.B. 2020 no. 18  i P.B. 2020 no. 22).

For di introdukshon di e areglo aki, e tim di inspekshon ekonómiko a keda apuntá pa amplia nan régimen di kontrolnan rutinario pa asina inkluí supervishon riba kumplimentu di e desishon aki. Mas ku klaro komo siudadano nos tambe mester keda atento, pues si abo tuma nota di preisnan eksorbitante di un òf mas di e produktonan ariba menshoná, indiká esaki pa medio di un WhatsApp na e tim di inspekshon ekonómiko via number di telefòn +599 9 511-1444.

 

Ministerio konserní