Publiká riba 05 Febrüari 2021
WILLEMSTAD – Servisio pa Planifikashon Urbano (ROP) un biaha mas ta rekordá komunidat i partidonan polítiko en partikular tokante reglanan vigente pa propaganda polítiko den áreanan públiko. Por trata aki di bòrchi, bandera òf kualke otro opheto. Tur partido polítiko por pone nan propaganda polítiko segun e maneho di propaganda. Esaki ta enserá ku por pone propaganda for di dia di entrega di lista di partidonan polítiko ku tabata dia 21 di yanüari último te ku 8 dia despues di e fecha di elekshon, esta 27 di mart 2021. Esaki ta konforme “Landsverordening Openbare Orde” (LOO) artíkulo 16 insiso 4. ROP ta hasi un apelashon na tur partido pa nan tene nan mes na e reglanan.
Pa seguridat di nos komunidat den áreanan públiko i kuido di nos mobilario di kaya, ta importante pa tene kuenta ku propaganda no tin mag di entre otro:
Kousa daño na kaya i/òf ophetonan den área públiko. Nan no por ta forma un estorbo pa uso efisiente di e área públiko i/òf opstakulisá e aksesibilidat. Tampoko nan por forma un opstákulo pa seguridat den tráfiko, stroba mantenshon di e área públiko i hasi daño na e bista di esaki.
Ta importante pa informá ku NO ta pèrmití pone propaganda polítiko riba rotònde, krusada(nan) di tráfiko, middenberm, i tampoko na lusnan di tráfiko. Na momentu ku un partido polítiko pone material no konforme e reglanan stipulá, e tim di kòntròl lo por kita su material di propaganda, riba gastu di e partido. Esaki sigur kaminda esaki ta kousa un peliger pa tráfiko. Mirando esaki, ROP ta hasi un yamada serio pa evitá gastu i no pone propaganda kaminda esaki no ta permití.
ROP ta traha duru pa órdena i manehá e parti di propaganda polítiko. Di e forma akí, nos komunidat por simpatisá ku nan eskoho personal na un manera bon strukturá. ROP ta pidi tur partido polítiko pa mantené nan mes na tur regla i eksigensia eksistente.
Pa mas informashon tokante eksigensia di tipo di propaganda polítiko, por tuma kontakto ku VVRP na info.vvrp@gobiernu.cw. Tambe por bishitá e link riba website di Gobièrnu di Kòrsou pa e komunikado anterior: https://gobiernu.cw/nieuw/reglanan-pa-propaganda-politiko-den-areanan-publiko/
