Publiká riba 10 Sèptèmber 2021
Programa piloto nobo ‘Archipel.eu’
WILLEMSTAD – Pa medio di un programa ku ta karga e nòmber di Archipel.eu, artista i organisashonnan kultural prosedente di Pais i Teritorionan den Ultramar (Overseas Countries and Territories- OCT) i Regionnan Ultraperifériko (Outermost Regions- OR) awor lo por apliká pa risibí finansiamentu. Union Oropeo ta finansiá e programa Archipel.eu ku e meta pa krea posibilidatnan pa asina pais- i teritorionan ku tin un laso ku Oropa tambe yega na fondonan nesesario pa por realisá entre otro aktividat i proyektonan kultural. Komo un pais asosiá na Union Oropeo, Kòrsou tambe ta keda konsiderá un pais den ultramar i komo tal persona- i organisashonnan lokal tambe lo por forma parti di e programa akí si nan ta deseá esei.
E programa di Archipel.eu lo inisiá 11 di òktober próksimo i tin un durashon total di 24 luna. E programa akí ta inkluí apoyo finansiero dirèkt pa profeshonalnan riba tereno kultural, artistanan individual, gruponan di artista òf organisashon i institutonan kultural establesé den e 9 Pais i Teritorionan den Ultramar i e Regionnan Ultraperifériko. Durante e programa di Archipel.eu, tur persona i organisashon interesá lo tin tres oportunidat pa apliká pa risibí fondo. Den kaso di persona- i organisashonnan lokal ku tambe lo ta interesá pa forma parti di e programa di Archipel.eu, EU Desk Curaçao ta asistí i guia den esaki.
E promé oportunidat pa apliká lo ta pa e Fondo pa Preservashon i Balorashon di e Kulturanan den Ultramar i lo inisiá dia 11 di òktober ku un durashon di 12 siman. E fondo akí, ta spesialmente dirigí riba aktividatnan (tantu físiko komo virtual) ku ta tuma lugá den kuadro di konservashon i balorashon di patrimonionan intangibel den e Pais i Teritorionan den Ultramar i e Regionnan Ultraperifériko.
Di dos fondo ku por apliká p’e lo ta e Fondo di Mobilidat. Esaki ta un fondo spesialmente dediká na interkambio i koperashon pa ku proyektonan kultural. Pa e fondo akí tin dos momentu ku por entregá aplikashon. E promé periodo lo inisiá dia 11 di òktober i lo dura un total di 8 siman. E Fondo di Mobilidat lo sostené 22 petishon di mobilidat di persona, artista i profeshonalnan den e área di kultura. Na luna di febrüari 2022 e di dos parti di e fondo akí lo inisiá ku e enfoke riba kreashon di retnan di profeshonalnan den kultura.
E di tres fondo ku e programa di Archipel.eu ta ofresé tambe lo habri 11 di òktober i lo dura un total di 6 siman. Esaki lo ta pa e Archipel.eu Collection. E fondo akí lo apoyá distribushon di kreashonnan artístiko chikí ku tin di aber ku patrimonio i kreashonnan kontemporáneo.
Durante durashon di e programa di Archipel.eu, e Asosiashon di Pais i Teritorionan den Ultramar (OCTA) ta ofresé asistensia na tur persona i instansia ku ta deseá di partisipá. E asosiashon ta organisá entre otro seminarionan virtual pa asina hasi posibel ku un i tur lo por tin éksito ku nan partisipashon. Pa mas informashon tokante OCTA i e asistensia ku e asosiashon ta brinda durante e programa akí, por bishitá www.overseas-association.eu.
Persona- i organisashonnan lokal ku ke mas informashon òf mester di yudansa pa apliká pa un di e fondonan akí, por aserká EU Desk Curaçao via di nan página di Facebook òf por manda un mail na eudeskcuracao@gobiernu.cw.
