Publiká riba 06 Febrüari 2020
SER KÒRSOU ANFITRION DI E PROMÉ ENKUENTRO REGIONAL DI KONSEHONAN SOSIAL EKÓNOMIKO PA 2020.
WILLEMSTAD, 6 di febrüari 2020 – ‘Futuro di Trabou i e Agènda 2030: Ophetivonan i Aspirashonnan Kompartí’. Esei ta e tema prinsipal di e promé enkuentro di aña 2020 di e ret regional di konsehonan ekonómiko i sosial di Latino Amérika i di Karibe (La Red de Consejos Económicos y Sociales de América Latina y el Caribe, CESALC) ku lo tuma lugá dia 19 pa 21 di febrüari próksimo aki na Kòrsou. E reunion aki ta wòrdu di ‘host’ pa Konseho Sosial Ekonómiko (SER) di Kòrsou, den estrecho kolaborashon ku e Asosiashon Internashonal di Konsehonan Ekonómiko i Sosial i Institutonan Similar (AICESIS), ku asistensia tékniko di Organisashon Internashonal di Trabou (OIT). E ophetivo di e enkuentro aki ta pa promové transferensia di konosementu i di interkambio di práktika ku e fin pa mehorá e desempeño institushonal di e miembronan di e ret. E enkuentro lo tuma lugá den hotèl Dreams Curaçao Resort, Spa & Casino.
E lo ta un foro di debate i reflekshon riba e papel di konsehonan ekonómiko i sosial di Latino Amérika i di Karibe den tratamentu di dos asuntu di gran importansia pa nos region, esta, futuro di trabou i e Agènda 2030 di Nashonnan Uní ku ta trata e ophetivonan di desaroyo sostenibel. Durante e enkuentro lo debatí riba temanan manera protekshon sosial, e posishon di hende muhé riba merkado laboral, desigualdat di género, diálogo sosial i aliansanan regional i internashonal nesesario pa alkansá e ophetivonan di desaroyo sostenibel i hasi un frònt kontra e desafionan ku futuro di trabou ta trese kuné.
Banda di e miembronan di e ret CESALC, lo tin partisipantenan di otro konsehonan ekonómiko i sosial, ministerionan di trabou i institushonnan ku ta dirigí e diálogo sosial na Latino Amérika i Karibe.
Pa mas informashon riba e evento por wak e wèpsait di SER: www.ser.cw.
Konteksto
Latino Amérika i Karibe pa dékadanan kaba ta wòrdu karakterisá ku e region di mas desigual na mundu. Apesar ku protekshon sosial ta un derechi i e ta klave den e lucha pa eradiká pobresa, evitando asina marginalisashon i apesar di e gran avansenan ku a lográ, e kapasidat efektivo di e paisnan di Latino Amérika i di Karibe pa brinda garantianan universal di protekshon sosial a largo plaso ainda ta limitá. Ainda ta eksistí desigualdatnan grandi, partikularmente bou di trahadónan ku ménos ingreso, personanan ku ta biba den zonanan rural i hende muhé. Kasi 5 aña despues di a firma e Agènda 2030 di Nashonnan Uní pa e Desaroyonan Sostenibel, e apoyo di region pa implementashon di e ophetivonan di desaroyo sostenibel ta ganando impulso.
Sin embargo, aún tin hopi desafio. E ret CESALC ta uni diferente esfuerso pa promové partisipashon sosial, diálogo i demokrasia den Latino Amérika Latina i Karibe. E ret ta identifiká komo temanan prioritario pa un enfoke konhunto: lucha kontra di pobresa i desnutrishon króniko; promoshon di salú i bienestar, igualdat di género, trabou desente i kresementu ekonómiko, desaroyo industrial inklusivo i sostenibel i inovashon den nos region. Tambe e ret ta apoyá formulashon di plannan, maneho i programanan ku ta garantisá derechinan ekonómiko i sosial di poblashon.
