Publiká riba 27 Òktober 2023
WILLEMSTAD – AKtualmente tin un di e akshonnan di e agènda di ehekushon di e pakete di pais (Landspakket) tumando lugá. Esaki ta un ‘quick scan’ di e 9 ministerionan di pais Kòrsou. E quick scan akÍ ta den kuadro di e proyekto “Mehorashon di funshonamentu di Gobièrnu”.
E quick scan na promé lugá ta pa haña un bista riba e tareanan eksistente di kada ministerio. Alabes ordená e tareanan akÍ i traha un plachi di e kantidat di direktoradonan pa kada ministerio. Lo tene kuenta ku e prinsipionan di guia di e rapòrt “Niets doen is geen optie meer!” (Hasi nada no ta un opshon mas!). E aparato públiko mester bira mas efisiente, mas efektivo pero tambe mester bai aktua mas desisivo. Mester krea mas kapasidat di preparashon i ehekushon. Un gobièrnu ku ta funshoná mihó no ta keda kreá ku tumamentu di mas hende den servisio. Mester tuma lugá un reforma fundamental di e aparato públiko di gobièrnu den kual digitalisashon ta para sentral.
E trayekto di quick scan lo tuma 8 siman i segun plan lo keda terminá na fin di òktober 2023.
