Publiká riba 29 Yüli 2020
WILLEMSTAD — Gobièrnu di Kòrsou den su afan pa alsa e impakto di konsiensia i formashon kultural den nos komunidat a yega na un plan konkreto pa reformá e instituto enkargá ku ehekushon di maneho di kultura. Intenshon di esaki ta pa alsa efisiensia i efektividat, hasi mas ku ménos i sostené avanse di nos pueblo riba e tereno kultural i artístiko den tur aspekto. Esaki tantu riba tereno edukativo, ekonómiko, di arte, di desaroyo di norma i balor i hopi mas.
Kultura i Arte tin un funshon importante den krea oportunidat pa un desaroyo balansá pa tur miembro di nos komunidat komo un motor pa kombatí pobresa i logra desaroyo duradero. E ta fuente ku ta sirbi pa enrikesé nos bida dor di duna nos un bista mas habrí riba nos mundu i ku ta mara i fortifiká nos komunidat den tur sentido di palabra.
Den su kompromiso pa sostené desaroyo di kultura i arte den nos nashon, Gobièrnu a funda e instituto Fundashon Kas di Kultura Kòrsou dia 20 di febrüari 2002 i a kumpra produktonan te ku awor. Mirando e nesesidat pa desaroyá e konsiensia kultural di un forma duradero, ehekushon di e maneho mester keda re-evaluá i adaptá na e nesesidat aktual di nos komunidat. No ta deskonosí ku e situashon finansiero na Kas di Kultura ya pa basta aña ta hopi preokupante i krítiko. Banda di gastunan mensual ku ta bastante haltu i no efisiente, e fundashon a krea un debe amplio durante último añanan. Esaki ta pisa riba e supsidio ku en realidat mester bai pa edukashon, formashon i partisipashon den kultura i arte. Esaki tin komo konsekuensia ku Kas di Kultura den e forma aktual no por operá di un forma responsabel pa realisá e tarea ku e fundashon a keda enkargá kuné.
Gobièrnu di Kòrsou ke alsa e impakto di bon práktikanan ku ya ta eksistí, dor di trese e funshonnan di e instituto mas serka di komunidat i alsa partisipashon aktivo di organisashonnan i siudadanonan den arena kultural i artístiko. Por ehèmpel introdusí agentenan di kultura ku kompetensianan múltiple den skol i den bario. Meta ta pa fortifiká formashon i edukashon, kreando programanan pa stimulá konosementu di nos historia, nos hérue i baluartenan, desaroyá talentonan artístiko amplio, alsa balor propio i konsientisashon di nos identidat. Tambe ta importante pa salbaguardiá nos herensia kultural tangibel i intangibel, inkluso nos norma i balornan. Tur esaki pa medio di imbestigashon, dokumentashon, krea kuríkulo i programanan duradero. Otro propósito prinsipal ta pa eksplorá produktonan kultural ku ta generá entrada di forma ku e organisashon no ta keda dependiente 100% di supsidio.
Pa salbaguardiá e instituto ku ta É medio pa logra e impaktonan deseá riba área di kultura i arte, lo implementá e siguiente kambionan konkreto:
Den e proposishonnan a tene kuenta ku ordenansa di supsidio, Quickscan Kas di Kultura 2011-2012, Rapport Operational Audit Kas di Kultura 2013 – SOAB, Rapport Mollen 2014, kuentanan anual di Fundashon Kas di Kultura Kòrsou, relatonan sosial i plan pa salbaguardiá kuponan di trabou den Fundashon Kas di Kultura Kòrsou.
Sektor di Kultura i Deporte huntu ku direktiva di Fundashon Kas di Kultura Kòrsou i sindikato P.W.F.C., representando e trahadónan, a sinta pa deliberá riba diferente senario pa salbaguardiá tur e derechinan atkerí di e trahadónan i garantisá e mihó resultado pa tur partido. Tur aktor embolbí a sinta huntu ku trahadónan djaluna 27 di yüli ultimo, p’asina duna informashon riba e kambio di maneho i proposishon di e pakete di retiro boluntario. Tur trahadó lo risibí kompensashon adekuá i adishonalmente por partisipá na un programa di kapasitashon pa ku desaroyo personal, desaroyo di talento i kon pa lanta propio empresa den area kultural i artístiko. Sektor di Kultura i Deporte di Gobièrnu di Kòrsou lo guia e proseso di reforma huntu ku direktiva i ku tur trahadó. Alabes lo sigui konsultá ku diferente grupo i persona pa yega na e mihó forma pa implementá e kambionan.
Ku e trayekto di reforma, netamente ta dal un paso den transformashon duradero na benefisio di e sektor i industria kultural i artístiko, kaminda lo invertí muchu mas den programanan pa desaroyo di kultura i arte riba tur nivel, inkluso den skolnan. Lo kumpli mas ku e demanda aktual ku tin den komunidat i lo tin un mishon renobá pa alsa promoshon, partisipashon, edukashon kultural i artístiko na Kòrsou awor i den futuro.
