Mi nòmber ta Cindy Rojer, nasé i kriá na Hulanda i awor bibando pa 11 aña kaba na Dushi Kòrsou: e pais kaminda mi tata a nase. Na Hulanda mi a traha pa sigur 15 aña na Deloitte ehersiendo diferente funshon den e departamento di Organisashon i Rekurso Humano (HRO). Despues di esei mi a hasi e traspaso pa Deloitte Dutch Caribbean, na unda mi a fungi pa kuater aña komo hefe di HRO pa e kantornan di Kòrsou i Aruba.

Na 2016 mi a hasi e traspaso pa Gobièrnu di Kòrsou pasobra mi kier a duna mi granito den mi kapasidat i na mi manera na e pais. Mi a kuminsá na Ministerio di Hustisia den e ròl di hefe di HRO na e Parkèt di Prokurador-General, responsabel pa e parkètnan na Kòrsou, Sint Maarten i islanan BES.

Na 2020, nèt promé ku COVID-19 a hasi su entrada na Kòrsou, Ministerio di Maneho di Gobernashon, Planifikashon i Servisio Públiko a puntra mi pa skirbi e ‘Blauwdruk HRO’ pa loke ta trata reorganisashon di Rekurso Humano di Gobièrnu i su servisionan. E despliegue di e ‘Blauwdruk’ a keda aprobá komo proyekto den tantu e “Programa di Gobernashon 2022-2025: Na kaminda pa rekuperashon i mihó kalidat di bida pa e pueblo” komo den e agènda di ehekushon di e Pakete Pais Kòrsou.

Na fin di 2021 mi a keda añadí promé komo punto di kontakto i for di febrüari 2022 komo miembro, na e tim di proyekto ‘Doorlichting ambtelijke topstructuur Curaçao, implementatie beleidskader Management Development voor topkader en Bestuursdienst’. For di aprel 2023 a transformá e proyekto pa e programa ‘Verbeteren Functioneren Overheid’ (VFO), na unda mi ta forma parti di e tim di organisashon den e programa di VFO komo miembro di e mesun tim. 

Den e Programa di Gobernashon, bou di kapítulo “Prioridatnan di e Ministerio di BPD”, i den e agènda di ehekushon di e Pakete Pais, bou di tema B, tin tambe otro proyektonan riba e tereno di desaroyo organisatorio i di Maneho di Rekurso Humano. Komo ‘programmamanager’ mi ta involukrá supstansialmente den ehekushon di e proyektonan akí i ta supervisá e koheshon den su totalidat.

E propósito pakiko mi a hasi e traspaso pa Gobièrnu di Kòrsou a kuminsá duna su frutanan. Mi ta orguyoso di por duna un aporte na un mihó funshonamentu di gobièrnu, tantu den servisio na pueblo i na e empleadonan públiko, huntu ku tur esnan ku ta brinda sosten na Gobièrnu di Kòrsou. 

Kerido koleganan di Gobièrnu di Kòrsou, 

Na 2019 ami, Ben Kokx, a keda involukrá pa promé biaha ku boso bunita pais. E tempu ei mi tabata fungi komo sekretario di e ‘Voortgangscommissie’, responsabel pa vigilá ehekushon di e ‘Groei Akkoord Curaçao. Nos tarea tabata pa raportá tokante di e desaroyonan na gobièrnunan di Kòrsou i Hulanda. Mi eksperensia ku Kòrsou ta data for di e periodo ei, motivá pa mi konvikshon ku e pais riba tereno sosial, ekonómiko meskos ku den servisio públiko – despues di 10 aña di outonomia – meresé i por mihó. Na momentu ku mi a risibí e petishon pa bira lider di e proyekto ‘Doorlichting ambtelijke topstructuur Curaçao, implementatie beleidskader Management Development voor topkader en Bestuursdienst’, mi a bisa ‘si’ sin ningun duda. Mi motivashon pa esaki ta bini for di e deseo pa di e forma akí duna mi aporte na desaroyo di gobièrnu i sirbi e pais. 

For di e tempu ei mi ta traha ku hopi entusiasmo i plaser huntu ku Cindy Rojer i Jason Nisbet na e proyekto ku entretantu a krese bira un programa ku diferente otro proyektonan mas. Na unda ku por nos ta kontribuí ku tur nos eksperensia i abilidatnan individual. 

Ku mas di 40 aña di eksperensia trahando pa Gobièrnu di Hulanda, di kual e promé 20 añanan komo lider sindikal i despues komo konsehero, guia di proseso òf mènedjer di programa riba tereno di kolaborashon entre gobièrnunan, maneho, ‘good governance’ i desaroyo di organisashon gubernamental, mi ta kontribuí ku mi konosementu generá i mi eksperensia na Kòrsou. Mi ambishon ta pa, hasiendo uso di mi ‘netwerk’ na Hulanda, sirbi tambe komo intermediario entre ministerionan di Kòrsou i Hulanda, spesialmente di munisipionan. Esaki por kontribuí na un interkambio di konosementu, eksperensia i sosten, ku lo resultá den un mihó funshonamentu di Gobièrnu i un posishon fuerte komo isla independiente. 

Mi ta kontentu ku resientemente Konseho di Minister a bai di akuerdo ku e proposishonnan di mehorashon saká for di e rapòrt ‘Niets doen is geen optie meer!’ Nos a skohe pa e título aki ku konvikshon, pasobra e gobièrnu i de paso e pais por mihó i p’esei tambe meresé mihó. Ta algu bunita di por duna guia huntu ku minister Martina di Maneho di Gobernashon, Planifikashon i Servisio Públiko, e tim di programa i nos ‘kwartiermaker’ nan den e temporada benidero pa implementashon di e proposishonnan di mehorashon di e rapòrt.

Kerido empleadonan den servisio di Gobièrnu di Kòrsou,

Na 1998 ami, Jason Nisbet, a kuminsá traha pa promé biaha na ‘Eilandgebied Curaçao’ komo mènedjer di e programa ‘Transformashon’. E trayekto di kambio na gran eskala pa e aparato insular, bou di guia di Stephan Covey, a forma e transformashon for di e organisashon mes pa medio di un kolaborashon intensivo ku e aparato públiko. E promé aporte akí na desaroyo di mi isla natal a sigui despues ku mi a finalisá mi estudionan di Geografia, Sosiologia i Siensia organisatorio i polítiko na Hulanda.

Durante 13 aña komo empleado públiko den gobièrnu, m’a duna mi aporte den diferente manera na desaroyo di Teritorio Insular, e pais Antia Hulandes i finalmente na realisashon di e státus outónomo pa pais Kòrsou. Ku hopi plaser mi a traha entre otro riba renobashon di  trayektonan digital, introdukshon di instrumentonan di maneho, formashon di vishon i ‘Nation Building’ pa Pais Kòrsou i diseño di e Maneho Gubernamental Nobo, ku a keda revisá resientemente. Mi a klousurá mi karera den sektor públiko komo Direktor di Servisio di Imigrashon despues ku mester a organisá servisio komo un ‘conditio sine qua non’ pa traspaso di e entidat nobo Pais Kòrsou.

Na 2011 mi a hasi e traspaso pa sektor privá, na unda mi a kuminsá na KPMG. Einan mi tabata responsabel pa ‘Strategy, People and Change’ den Karibe Hulandes i Sürnam. Entretantu mi ta trahando pa 4 aña kaba na EY komo esun responsabel pa People Advisory Services. Na e momentonan akí mi tereno laboral ta inkluí hinter e teritorio Karibense banda di Karibe Hulandes i Sürnam. 

For di 2021 mi ta forma parti huntu ku Ben Kokx i Cindy Rojer di e tim pa e proyekto ‘Doorlichting ambtelijke topstructuur Curaçao, implementatie beleidskader Management Development voor topkader en Bestuursdienst’. Entretantu e proyekto akí a krese bira un programa. E aprobashonnan di Konseho di Minister a hasi e kaminda liber pa kuminsá ku implementashon di proposishonnan, manera nan ta inkorporá den e rapòrt “Niets doen is geen optie meer!”. 

Mi nòmber ta Melinda Domacassé i ku plaser mi ta kordiná e tim di komunikashon for di Direktorado di Komunikashon i Informashon (C&V). 

Huntu ku nos tim nos tin e enkargo importante pa tene boso na altura di e último desaroyonan rondó di e programa di VFO. Nos enfoke ta riba un komunikashon transparente i habrí, no solamente interno pero tambe eksterno. Nos meta ta pa no solamente informá pero tambe inkluí boso den e stapnan ku nos ta tuma. 

E programa VFO ta di gran importansia pa nos tur i mi ta kere firmemente den e poder di komunikashon kla ku ta stimulá komprondementu i kolaborashon. Nos ta para kla pa traha i pa huntu ku e tim di programa kontestá tur pregunta, kompartí informashon i krea un brùg entre boso i e desaroyonan ku ta tuma lugá. 

No duda pa tuma kontakto ku nos si bo por tin kualke pregunta òf na momentu ku tin algu ku bo ke risibí mas informashon tokante di dje. Huntu nos por traha riba un kultura komunikativo fuerte ku ta kontribuí na éksito di e programa VFO i nos meta komun di mehorá nos servisio. 

For di novèmber nos por konta komo Tim-VFO riba e sosten di tres profeshonal hóben di e team di EY. E koleganan aki, esta Julia Kool, Brie Renfurm i Iona Trouwloon, ta entusiasmá i lo duna nan aporte riba riba tereno sekretarial i pa loke ta trata e kontenido for di un perspektiva nobo. Brie tin eksperensia den ingeneria Kímiko (Chemical Engineering) i ta dediká su mes prinsipalmente riba reorganisashonnan grandi, kaminda e tambe ta operá den sektor públiko i privá. Nos ta yama un bon bini na e profeshonalnan hóben akí ku basá riba nan eksperensia lo ta di gran balor pa e trayekto akí. 

Mi nòmber ta Hillen Oost, 47 aña di edat, kasá ku Ayumi i un mayor orguyoso di dos yu, Saya (15) i Toma (11). Na kas nos ta papia hulandes i hapones pa motibu di e desendensia di mi kasá. Despues di mi estudio di Egiptologia mi a traha algun aña na Tokio den formashon lingwístiko Ingles. Despues mi a traha 12 aña pa gobièrnu lokal na Hulanda, di kual e último añanan komo konsehero stratégiko di servisio na munisipio Almere. For di 2019 mi ta enbolbí ku hopi entusiasmo den diferente proyektonan di kooperashon rondó di servisio (digital), manera pa VNG Realisatie, Joint Research Centre (Komishon Oropeo) i VNG International. 

Riba 15 di sèptèmber 2023, mi a kuminsá den e ròl di ‘Kwartiermaker Externe Dienstverlening’, komo parti di e programa VFO. Pa durashon di e programa te ku 31 di mart 2024 lo mi pasa mas tantu tempu posibel na Kòrsou. Mi proyekto ta kuminsá ku e akuerdo di Konseho di Minister pa krea un lokèt di gobièrnu (frontoffice) pa akseso na servisionan eksterno pa komunidat, den forma di servisionan individual i produktonan pa siudadanonan, empresanan i organisashonnan.

Pa realisá esaki, mi lo konsentrá promé ku tur kos riba formulashon di un konsepto pa duna servisio nobo. E konsepto akí lo sirbi komo kuadro di referensia pa eskohonan ku ta trata diseño i aplikashon di servisionan eksterno, ku lo ta evaluá a base di koherensia, konsistensia i servisio na kliente. Banda di esei mi ta traha tambe riba e proposishonnan di diseño pa formashon di un direktorado nobo den e ministerio di Maneho di Gobernashon, Planifikashon i Servisio Públiko. E direktorado akí lo bai ehekutá e funshon sentral di ‘front-office’, ku lo garantisá e kalidat di e kooperashon entre ministerionan den e kadenanan i ku lo fasilitá e gestion i mehorashon di e prosesonan pa duna servisio. 

Finalmente mi ta bai enfoká riba formulashon di e proposishon di proseso ‘onboarding’ komo preparashon riba e konekshon di produktonan/servisio/prosesonan di ministerionan na e ‘front-office’ sentral ku lo bini pronto. 

Mi mishon ta pa pone un fundeshi pa mehorashon di e servisionan eksterno di Gobièrnu di Kòrsou. Aki mi ke duna mi aporte na un mihó kolaborashon entre ministerionan kaminda maneho integral i proaktivo riba kalidat lo ta realisá. Esaki lo sòru ku por yuda hendenan den  un solo biaha i e akseso na servisio lo ta enfoká mas tantu for di e punto di bista i nesesidat di abitantenan, komèrsio i institutonan. 

Mi nòmber ta Narin Ramsoedh, nase i kriá na Utrecht, na unda ku mi ta biba ku hopi plaser huntu ku mi kasá i yu muhé. Ademas mi tin un apresio grandi pa momentunan plasentero ku mi ta pasa ku mi amigunan. 

Despues di a laborá algun aña den sektor empresarial, mi a hasi e traspaso 20 aña pasá pa laborá den gobièrnu. Aki mi a kumpli ku diferente funshon riba e tereno di gestion empresarial, maneho di proseso, ouditoria i maneho di programa. Den banda di mi trabou mi ta aktivo tambe komo polítiko lokal, mi ta disfrutá di músika i tin apresio pa un bon pelíkula. 

For di medio di yanüari 2024 lo mi kuminsá den e programa ‘Verbeteren Functioneren Overheid’ (VFO) komo kwartiermaker Interne Dienstverlening/Bedrijfsvoering. Den e ròl akí lo mi duna mi aporte na profeshonalisashon di gestion empresarial i proseso interno di servisio. 

Gestion empresarial pa mi ta un kombinashon di diferente (kadena di) proseso, e konosementu i abilidatnan di e personanan ku ta ehersé, sistemanan ku ta sostené, metanan ku bo ke logra i e ambiente ku diferente deseonan. Pa laga esaki kana fásil ta esensial pa tin un repartishon di ròl kla den tareanan, kompetensia i responsabilidatnan den (i entre) maneho, staf i kolaboradónan. Ku esaki e gestion di maneho lo ta koresponsabel  pa resultado di e prosesonan primario i resultadonan organisatorio den su totalidat.

E programa VFO a ehekutá diferente trabou kaba, i mi intenshon ta pa sigui konstruí riba e esfuersonan ku ya a wòrdu hasí. E rumbo ta enfoká riba konstrukshon di mas ekspertisio i resistensia riba e tereno di gestion di maneho. E proseso integral i uniforme di traha i simplifikashon di e prosesonan di servisio lo ta e puntonan di enfoke prinsipal. 

Pa haña un bista di e profeshonalisashon akí di tareanan i kuestionnan ku ta pertenesé na esei, un bon análisis ta nesesario. Medio di yanüari lo mi sera konosí i lo hasi kombersashonnan di eksplorashon ku funshonarionan prinsipal den e organisashon. Mi ta ansioso pa huntu ku mi koleganan, traha riba diferente di e retonan interesante. Mi ta entusiasmá i ta wak pa dilanti riba un kolaborashon fruktífero.

Un saludo kordial, 

Narin Ramsoedh

Ami ta Myron C. Eustatius.

Mi a studia Juridische Bestuurswetenschappen (Bestuurskunde) na Universidat di Tilburg i dirèkt despues di mi estudio mi a bini bèk Kòrsou pa bin kontribuí na mi pais.

Mi a kuminsá na Directie Bestuurlijke en Constitutionele Zaken (Land) promé di yanüari 2003 komo asistènt kolaboradó di maneho. Den 9 aña mi a krese bira promé direktor di maneho interino na Ministerio di Tráfiko, Transporte i Planifikashon Urbano i for di 2016 mi ta direktor di maneho na Ministerio di Gobernashon, Planifikashon i Servisio Públiko. Mi tin pues mas di 20 aña di eksperensha ku desaroyo di maneho den gobièrnu na Kòrsou den diferente funshon i diferente ministerio.

For di 1 di mart lo mi fungi tambe komo kwartiermaker pa Direktorado di Maneho Nashonal den e programa ‘Verbeteren Functioneren Overheid’ (VFO).

Meta di e organisashon akí ta pa desaroyá maneho di un manera mas holístiko riba terenonan ku ta eksigí kolaborashon estrecho entre mas ku un ministerio. Ku esaki nos lo logra mas kolaborashon den gobièrnu, mas efektividat di maneho di Gobièrnu di Korsou mientras nos ta hisa tambe e efisiensia di nos gobernashon.

Pa realisá e proyekto akí lo mi konta riba eksperiensia i konosementu di mi koleganan. Huntu nos por mehorá funshonamentu di nos organisashon.

Mi nòmber ta Bernd Klein Schiphorst, 57 aña di edat, kasá ku Monique. Nos ta biba na Den Haag i tin un yu muhé yamá Iris ku ta biba ku su pareha na Delft.

Riba 15 di aprel 2024 mi a kuminsá komo ‘kwartiermaker’. Lo mi ehersé mi ròl di ‘kwartiermaker’ prinsipalmente na Kòrsou. Mi enkargo ta dura te ku yüli 2025.  Den e rapòrt ‘Niets doen is geen optie meer!’ tokante di e revishon di e struktura atministrativo tòp di e ministerionan, a inkluí e proposishon pa funda un “Directie Topkader Overheid” (DTO) o sea un Direktorado Ehekutivo di Gobièrnu. Konseho di Minister a aprobá e rapòrt den luna di novèmber 2023. E desishon di Konseho di Minister riba e rapòrt i su kontenido ta sirbi komo guia pa mi enkargo. E DTO lo ta responsabel den futuro pa kontratashon, selekshon, edukashon i desaroyo di maneho tòp di Gobièrnu di Kòrsou i ta forma un base organisatorio.

Mi tin mas ku 30 aña laborando pa Gobièrnu di Hulanda. Mi a laborá den diferente departamento i tambe na gemeente Amsterdam, semper riba e tereno di funshonamentu den sentido amplio. Di 1997 pa 2000 mi a biba i traha na Kòrsou. Mi a traha komo ‘beleidsmedewerker’ di finansa públiko i desaroyo ekonómiko na ‘Vertegenwoordiging van Nederland’ na de Rouvilleweg. Mi a biba i traha ku hopi plaser einan, pues nos ta hopi kontentu di por bini bèk Kòrsou.

E 15 lunanan benidero lo mi bai dediká na e lantamentu, diseño i ekipá personal di DTO, komo parti di Ministerio di Maneho di Gobernashon, Planifikashon i Servisio Públiko. Banda di esei mi ta traha tambe na e organisashon i ehekushon di un programa di maneho i desaroyo pa e maneho tòp. (awor akí SG’s, den futuro Direktornan General). I finalmente komo ‘kwartiermaker’ mi ta fungi tambe komo embahador di e DTO; den e periodo benidero lo mi bai dediká hopi tempu tambe na karga e propósito di tur loke tin di aber ku e programa di DTO, kual mi ta sostené kompletamente.

Mi meta ta pa – ku eksistensia di e DTO – profeshonalisá e maneho atministrativo den gobièrnu i reforsá e liderazgo pa asina laga gobièrnu funshoná mihó. Esei ta enserá, un gobièrnu aksesibel, servisial i konfiabel pa komunidat i e futuro generashon. Un gobièrnu ku ta sòru pa un servisio adekuá i profeshonal na nos siudadanonan, empresa i organisashonnan, kaminda lo atendé di forma responsabel ku tempu i fondonan públiko. Mi ta sintimi honrá, pero ta konsider’é tambe un reto di por kontribuí na esaki.

Mi ta entusiasmá i ta ansioso di por kolaborá ku demas ‘kwartiermaker’ nan , e tim di programa i e tòp atministrativo i polítiko di Kòrsou.

Bernd Klein Schiphorst