E di dos edishon di Gob. Newsletter tei!
Den e edishon aki bo por haña un bista riba entre otro e trayekto ku Gobièrnu a kuminsá kuné pa hisa nivel di funshonamentu di e aparato públiko. Den futuro nos ta bai dunabo mas informashon detayá riba e tema importante aki. Tambe nos ta bai informabo mas tokante produkto i servisio ku Gobièrnu ta duna. Awe nos ta papia riba Akta, Afschrift i Uittreksel.
Keda konektá pa bo risibí mas informashon ku ta Bon Pa Sa!
Mehorashon di e Aparato Púbkiko
Na aña 2022 a hasi un investigashon, kaminda mas ku 100 entrevista i kombersashonnan a tuma lugá pa haña un bista profundo riba funshonamentu di e aparato públiko. E investigashon a resultá den e rapòrt títula “Niets doen is geen optie meer!”. E trayekto aki finalmente ta benefisiá abo komo siudadano.
E rapòrt “Niets doen is geen optie meer!” ta inkluí proposishonnan tokante kon mehorá e struktura mas haltu den e aparato gubernamental, kon pa organisá i dirigí e ministerionan, kon e repartishon di ròl entre minister i esnan ku funshon haltu mester ta i tambe optimalisashon di tantu e servisio interno komo eksterno.
Loke ta importante tambe ta e parti operashonal i e kolaborashon entre ministerionan. Un tim di tres eksperto guiá pa un ‘ministeriële stuurgroep’ di 4 minister tin e enkargo pa ehekutá e proyekto den su totalidat. Konseho di Minister inisialmente a aprobá e proposishonnan ku a bini dilanti den e rapòrt.
E investigashon ku a tuma lugá aña pasá ta parti di e proyekto “Programma Verbeteren Functioneren Overheid (VFO)”. E proyekto den su totalidat tin komo meta pa restrukturá funshonamentu di e aparato públiko, spesialmente riba e nivel di mas haltu den e organisashon. E proyekto riba su mes ta resultado di loke ta bin dilanti den e Programa di Gobernashon i tambe loke Kòrsou i Hulanda a akordá ku otro via e Pakete Pais (landspakket). E ta dirigí riba tur 9 ministerio.
Komo e último stap promé ku kuminsá ku implementashon di e proposishonnan akí, mester yega na un akuerado ku sindikatonan riba e ‘Sociaal Beleidskader Organisatieverandering’. Dor di e maneho sosial akí lo registrá e garantianan hurídiko (rechtspositionele waarborgen) relashoná ku derechonan laboral. Entretantu tin negosashonnan ku ta tuma lugá tokante di e punto akí den CGOA. Meta ta pa yega na un akuerdo pa fin di yanüari 2024.
Konseho di Minister a firma e rapòrt di e ‘quick scans’ fase I pa e nuebe ministerionan, tokante e trabounan (prinsipal) i e kantidat di direktoradonan pa kada ministerio. Konseho di Minister a aprobá tambe, e proposishon pa kubrimentu di gastunan di programa VFO 2023 – 2025. Pues a asigná fondonan tambe pa sigui traha den e programa VFO.
Naturalmente abo komo siudadano tambe ta bai saka basta benefisio for di e trayekto aki. E mehorashon interno sigur lo hasi un impakto positivo riba e servisio ku bo ta deseá i tin derecho di haña. Mas detaye riba kontenido di e proyekto VFO ta sigui den nos siguiente edishonnan.
Akta i Uittreksel
Akta: Lei ta obligá nos pa hasi deklarashon di susesonan di bida manera nasementu, matrimonio, divorsio i fayesimentu ku tuma lugá na Kòrsou. Ku e deklarashon un ámtenar di Kranshi ta traha e akta di kada un di e susesonan aki ku e orario, e fecha i lugá di e suseso, nòmber, fam i fecha di nasementu di e persona embolbí. Riba un akta no ta bin adrès, ni number di identifikashon di e persona. Kranshi ta warda e aktanan aki.
‘Uittreksel’: Semper por hasi un petishon na Kranshi pa un ‘uittreksel’. E ‘uittreksel’ ta kontené bo informashon personal básiko na e manera ku bo ta registrá den atministrashon di Kranshi. E informashon ta number di sédula, nòmber, fam, fecha i lugá di nasementu , adrès i segun nesesario mas detaye.
Ki ora por haña un akta?
Únikamente:
- ora e akontesimentu (nasementu, kasamentu, rekonosementu, divorsio, fayesimentu) a tuma lugá na Kòrsou
- ora un ámtenar di Kranshi den un akta a stipulá e suseso (nasementu, kasamentu, rekonosementu, divorsio, fayesimentu) via di un deklarashon
Kiko bo mester pa hasi petishon pa un Akta i òf un ‘Uittreksel’?
- identifikashon bálido (sédula òf pasport òf reibeweis)
- un splikashon bon kla di e motibu di bo petishon
- kopia di komprobante di pago si bo a pag’é delantá online, karchi pa swaip òf e sèn nèt
Tin 2 tipo di ‘Uittreksel’
- Informashon básiko manera nòmber, fam, number di sédula, lugá di nasementu i adrès (Nafl. 5)
- Informashon spesífiko pa un kaso spesífiko ku sierto instansha ta rekerí (Nafl. 10)
Rekomendashon: semper informá pakiko spesífikamente e instansha ta pidibo pa un ‘Uittreksel’!
Kuantu ta dura pa haña un ‘uittreksel’?
Si bo hasi e petishon pa un ‘Uittreksel’ personalmente na bali, bo por hañ’é mesora (ora bo outorisá un hende tambe). Si bo hasi e petishon via mail, e por dura un máksimo di 2 siman. Petishonnan hasí via mail tin ku bai den format PDF via e adrès info.bsbv@gobiernu.cw, firmá huntu ku un kopia di identifikashon. Si e dokumento NO ta pa uso na Hulanda, mester indiká na kua pais ta bai us’é. Esaki ta pa Kranshi sa si e akta mester di un ‘apostille’ òf un ‘legalisashon’.
Ken por pasa buska e Akta i òf Uittreksel?
| Ken ta bin busk’é | Kiko mesté |
| Abo mes |
|
| Bo mayornan, bo kasá, bo yu (si e miembro familiar ta biba na e mesun adrès ku bo)
|
|
| Otro persona (Outorisashon) | Un karta di outorisashon riba papel ku e siguiente informashon:
|
Pa mas informashon tokante Akta i Uittreksel por bishitá loketdigital.gobiernu.cw.
ANUNSIO
Djòin Gobièrnu di Kòrsou su “Whatsapp Channel” i risibí tur informashon ofisial te den bo telefòn.
Klek riba e link pa djòin: https://whatsapp.com/channel/0029Va8ZkiL297520tBsAy15
Bishitá www.gobiernu.cw/vakaturanan pa tur e vakaturanan aktual di Gobièrnu di Kòrsou.
Mi t’Ámtenar: Inspektor Marítimo
Tin bia nos no ta realisá ku tin sierto profeshonnan ta den man di e empleado públiko. Hopi biaha ta trata di funshonnan vital ku diariamente nos ta hasi uso di e servisionan di dje direktamente òf indirektamente. E rúbrika aki ta lagabo sera konosí ku e ámtenar, e servisio ku e ta duna i su eksperensianan personal den e trabou. Esaki ta Inspektor Marítimo, Anthony Palma.
“Mai mi tambe mag bai ku Mai riba e barkunai?”. Ku e pregunta aki mi pashon pa mi profeshon komo inspektor marítimo a kuminsá. Mi tabata tin 9 pa 10 aña tempu mi mama i mi tanta riba djadumingu tabata bai kome riba e barkunan di turista ku tabata mara na waf. Anto ami tabata gusta e idea ei mashá pero mas ku kome mi ker a konosé e barku mes. Mi tabata asina impreshoná ku e barku grandi ei, ku mi ker a yega te kaminda e kapitan ta. Asina ma haña chèns pa bai konosé henter e barku te na e brug, ku ta kaminda ta stür e barku.
Mi entusiasmo a krese mas ainda ora mi mama a bai Boneiru ku mi serka mi primu ku ta loods. Ami kuné a dal un keiru riba un sleepboot. Einan ma kaba di disidí ku mi ta hasi mi bèst na skol pa bai HAVO i despues logra bai ‘Hogere Zeevaartschool’ na Hulanda, pa mi tambe bira kapitan di barku. Mi ambishon a sigui krese segun mi tabata nabegá, ora mi tabata hañami ku outoridatnan ku tabata bin inspekshoná e barku. E or’ei, via un merkado di fishi na Hulanda mi a solisitá pa bin traha na nos pais komo inspektor na Outoridat Marítimo di Kòrsou, ku ta den e ministerio VVRP.
Pa ami, kada inspekshon ta un reto riba su mes, pasobra e área marítimo ta masha dinámiko. Tin biaha e inspekshon di nos barkunan por tuma lugá ora e barku ta mará aki na Kòrsou. Otro biaha e barku ta mará den eksterior i mester biaha bai kaminda e ta pa hasi inspekshon. Tin biaha e barku ta den seku na un DOK i otro biaha e la aksidentá i mester bai wak kiko a tuma lugá pa traha prosès verbal. Kada inspekshon ta diferente. Pa un inspekshon anual mi ta yega e barku, tira un bista di pafó pa despues huntu ku e kapitan mi wak si e dokumentonan i e kondishon di e barku ta na òrdu manera e mashinnan, pòmpnan, alarma, radio pa komuniká i dokumentonan di kada tripulante.
Kada inspekshon tin un balor agregá na ekonomia di nos pais. Nos barkunan tambe ta karga un bandera ku internashonalmente ta bon respetá. P’esei ta mi obligashon komo inspektor di tene inspekshon riba e barkunan tambe na un nivel haltu pa riba un base internashonal Kòrsou mantené su registro atraktivo. Kada barku ku bin registrá serka nos ta nifiká un bon nòmber pa nos pais i un bon resultado pa nos ekonomia.
KOMUNIKADONAN DI PRENSA
Protokòl di koperashon entre Domeinbeheer i Planifikashon Urbano (ROP) | Lesa komunikado…
Desvelo di e estatua restourá di mr. dr. Moises Frumencio da Costa Gomez | Lesa komunikado…
Vakashon eskolar pa 2024-2025 i 2025-2026 | Lesa komunikado…
Gobièrnu di Kòrsou ta firma akuerdo ku Blue Planet Alliance i Greening the Islands | Lesa komunikado…
Planifikashon di èksamen naturalisashon 2024 | Lesa komunikado…
Kòdigo QR pa rekonosé nos monumentonan komo Patrimonio Mundial | Lesa komunikado…
