Servisio pa Atministrashon i Maneho di Tereno Públiko (Domeinbeheer)
Domeinbeheer ta responsabel pa kompra i benta di tereno i konstrukshonnan. Domeinbeheer ta responsabel tambe pa, na un manera optimal, asigná i manehá terenonan públiko, awanan teritorial i propiedatnan inmóbil di gobièrnu di Kòrsou. Domeinbeheer ta duna terenonan públiko na siudadanonan òf kompanianan pa nan por traha kas, pa metanan komersial i industrial, pa metanan turístiko i agrario. Pa hasi esaki, Domeinbeheer, na nòmber di Gobièrnu di Kòrsou, ta kobra erfpacht òf hür. Banda di tur esaki, Domeinbeheer ta kontrolá tambe okupashon ilegal di terenonan di gobièrnu i ta aktua si ta nesesario kontra di esaki.
Tareanan
- Desaroyá reglanan i instrumentonan pa por manehá terenonan i edifisionan di gobièrnu i tambe pa por manehá nos awanan teritorial;
- Manehá e parti di atministrashon finansiero di terenonan di gobièrnu, playanan, awanan teritorial, edifisionan i demas vienes inmóbil di gobièrnu;
- Kordiná proyektonan pa desaroyo di terenonan di gobièrnu i pone esakinan disponibel pa uso;
- Prepará terenonan pa por konstruí òf traha kas riba nan;
- Duna tereno di gobièrnu na persona òf organisashonnan pa nan usa den diferente forma entre otro erfpacht òf hür;
- Bende terenonan di gobièrnu, edifisionan i demas propiedatnan inmóbil di gobièrnu;
- Registrashon di terenonan di gobièrnu, playanan, awanan teritorial i edifisionan di gobièrnu;
- Maneho atministrativo di edifisionan di gobièrnu;
- Inspekshon di terenonan di gobièrnu, playanan, awanan teritorial, edifisionan i demas propiedat di gobièrnu, pa sòru ku nan ta wòrdu usa segun regla;
- Supervishon i kòntròl di uso di propiedat di gobièrnu pa sòru ku ta usa esakinan tambe segun palabrashonnan hasí via di kontrakt.
Website DOMEIN: https://www.domeinbeheer.cw/pap/
