Servisio pa Obra Públiko - Informashon tokante Gobièrnu di Kòrsou Bo opinion

Ministerio di Tráfiko, Transporte i Planifikashon Urbano

Servisio pa Obra Públiko

Servisio pa Obra Públiko ta sòru pa mantenshon i konstrukshon nobo di infrastruktura físiko (riba tera i bou di tera), fasilidatnan públiko, espasionan públiko i áreanan ‘bèrdè’. OW ta, den poko palabra, e organisashon di konstrukshon i ingenieria sivil di Kòrsou. E organisashon aki ta responsabel tambe pa atministrashon di e mapa topográfiko di Kòrsou, kùrmentu di instalashonnan di koriente, i tambe kùrmentu di ketelnan di stom.

Tareanan

  • Pone i mantené sistema di riolering i purifikashon di awa;
  • Maneho di e planta di purifikashon di awa di riol i su pòmpnan;
  • Pone i mantené riolering pa áwaseru;
  • Pone i mantené kayanan, plenchinan i mobilario di kaya;
  • Pone i mantené brùgnan i viaduktonan;
  • Planifikashon tékniko di e infrastruktura pa plannan di parselashon di terenonan i kordinashon tékniko pa prepará terenonan pa konstrukshon;
  • Maneho di e registro básiko topográfiko;
  • Midimentu di tereno;
  • Registrashon di puntonan di altura di superfisienan;
  • Kordinashon tékniko di mantenshon di edifisionan i instalashonnan di gobièrnu;
  • Preservá propiedatnan di gobièrnu;
  • Implementá maneho di e mangasina di gobièrnu;
  • Kùrmentu di instalashonnan di koriente;
  • Kùrmentu di ketelnan di stom;
  • Duna pèrmit pa trabounan di kobamentu, transportashon di materialnan pisa, konstrukshon di stèlazje i limpiesa kantu di kaminda;
  • Sòru pa depósito di vürwèrk i eksplosivo.