Newsletter GOB. | Edishon #1 - Informashon tokante Gobièrnu di Kòrsou

Bonbiní!

Bonbiní na e promé edishon di e promé boletin digital di Gobièrnu di Kòrsou. E boletin aki ta bai tenebo ‘up to date’ riba notisia, asuntunan legal, servisionan di gobièrnu, asuntunan edukativo, sosial i hopi mas! Riba tur esakinan nos ta habrí pa remarke i sugerensianan ku bo por tin. Kada dos siman ta sali un edishon nobo ku informashon al kaso. Keda pendiente…

Bishita di Prinsesa Beatrix na Kòrsou

Despues di dos dia kargá ku aktividat i bishita, Su Altesa Real Prinsesa Beatrix a bandoná Kòrsou pa bai Aruba. E delegashon Real a yega Kòrsou djaluna dia 6 di novèmber último i a risibí un kaluroso bon biní di parti di Su Ekselensia sra. Lucille George-Wout i vise Promé Minister sra. Ruthmilda Larmonie-Cecilia. Prinsesa Beatrix ta patrosinadó di ‘Dutch Caribbean Nature Alliance’ (DCNA). DCNA ta un organisashon ku ta salbaguardiá naturalesa den Karibe Hulandes dor di sostené maneho di áreanan protehá. P’esei e motibu básiko di e bishita tabata pa duna atenshon na un kongreso di DCNA tokante solushonnan natural pa rekuperá e sistema ekológiko di e islanan di Karibe Hulandes (Kòrsou, Aruba, St. Maarten, Boneiru, Saba, St. Eustatius).

Djamars, 7 di novèmber 2023, parti mainta Prinsesa Beatrix a bishitá Landhuis Savonet ku tabata forma parti di un di e plantashonnan di mas grandi di Kòrsou. E parke rondó di e edifisio ta kai bou di maneho di Carmabi (Caribbean Research & Management of Biodiversity Foundation) ku ta partner di DCNA. Personal di Carmabi a duna e Prinsesa splikashon di e importansia di e efekto di klima riba parke Kristòf. Asina tambe tokante kuido di animalnan den e área.

Despues Prinsesa, huntu ku un grupo di alumnonan di Skol di Fundeshi, a presensiá un lès edukativo riba konsekuensia di sushi den naturalesa. Akinan e famoso kantante di opera Yu di Kòrsou Tania Kross, a forma un kor huntu ku alumnonan di skol sekundario i a delitá presentenan ku algun kansion. Mas lat mainta e delagashon real a bishitá Shete Boka kaminda Prinsesa a haña un splikashon tokante e formashon di baranka i e bahia.

Riba e último dia e bishita a konsentrá den barionan di Otrobanda kaminda Prinsesa a mira tur e desaroyo i a kombersá ku diferente boluntario. E bishita a sigui mesora pa San Willibrordus. Akinan Carmabi a duna un splikashon amplio di e karakterístikanan úniko di e área. Despues a sigui un rekorido den e área rondó di e bahia di Jan Kok kaminda e Prinsesa a laga un wara wara bula bai. Finalmente Su Ekselensia ta terminá e bishita na Kòrsou ku un sena na Palasio di Gobernador.

Historia Bon Pa Sa - Kranshi November 2023

Kranshi, di unda e nòmber ei a bin?

E nòmber Kranshi tin un orígen masha pekuliar. E edifisio kaminda Kranshi for di prinsipio tabata ubiká, den pasado tabata un lokalidat Protestant kaminda un klup di hende muhé, yamá ‘Eendracht maakt macht’ tabata reuní regularmente. Na aña 1899 Marie van den Brink, yu muhé di e dominee, a funda e klup aki. Dor ku nan tabata bin huntu speshal pa hasi obra di man manera kose, bòrda i brei nan tabata yama e klup ‘dameskrans’. E nòmber ‘dameskrans’ den boka di e Yu di Kòrsou e tempu ei a bira Kranshi. Mesora esei a bira nòmber di e edifisio tambe.

E edifisio a mantené e nòmber Kranshi, asta ora ku na aña 1930 durante un periodo kòrtiku, Iglesia Reformá a usé pa su enkuentronan. Maske entretantu e nòmber ya no tabata tin su funshon original mas, e edifisio a keda karga e nòmber te na añanan ‘40 momentu ku Registro Sivil a kuminsá operá den dje. Na komienso di añanan ’60 Registro Sivil a muda (huntu ku e nòmber Kranshi) bai Skalo 150-152; kas kaminda anteriormente Pachi de Sola tabata biba. Den boka di pueblo e orei e edifisio original na Otrabanda a haña e nòmber ‘Kranshi bieu’.

Na komienso di e siglo aki Kranshi a bolbe muda. Awor e la bai e edifisio neoklásiko restourá yamá ‘Casa Blanca’ situá na Roodeweg 42 nèt enfrente di Hospital Sint Elisabeth (SEHOS). Carel Maurits Gaerste kende tabata doño di diferente edifisio den Otrabanda, entre 1865 i 1884 a kumpra i rekonstruí Casa Blanca komo bibienda. Despues e edifisio a sirbi komo penshun, despues burdel (ka’i biá) i despues segun e la dekaí e la bira asta un dak pa drogadiktonan. Awendia den e famoso edifisio aki nos Registro Sivil ta ubiká. E ta ofisialmente yamá Asuntunan Públiko pero ketu bai Kranshi den boka di pueblo!

Importansia di seguridat sibernétiko

Gobièrnu di Kòrsou a djòin Caricert, ku ta un organisashon ku ta prevení, detektá i atendé krimen sibernétiko, huntu ku Bureau TeleCommunicatie en Post (BTP) pa huntu kuminsá ku e asina yamá ‘Cyber Security Awareness Month’. Nos ta papia di krimen sibernétiko ora ku aktividatnan kriminal ta tuma lugá via kòmpiuter i internèt. Nòmbernan manera malware, phishing mail, phishing witches, ransom wolves i mas ta zona hopi den e área di krimen sibernétiko.

Den luna di òktober rònt mundu ta para èkstra ketu na e importansia di seguridat sibernétiko. E ta mesun importante ku e kandal na bo porta di kurá i e slòt na e portanan di kas ku mester ta bon sigurá. Gobièrnu ta konsiente ku e fenómeno di krimen sibernétiko aki ta krese kada dia aún mas. P’esei tambe a tene un ‘kick-off meeting’ pa presentá diferente tópiko interesante relashoná ku e tema. E intenshon ta pa empoderá tantu kompanianan komo abo ku ta usa un ‘device’ konektá na internèt, pa protehá tur data kontra di krimen digital.

Klek riba e imahénnan akibou pa mas informashon, prepará pa Caricert, kon pa protehá bo informashon personal online.