Enseñansa Obligatorio (Leerplicht) - Informashon tokante Gobièrnu di Kòrsou Bo opinion

Ministerio di Enseñansa, Siensia, Kultura & Deporte

Enseñansa Obligatorio (Leerplicht)

For di 1 di yanüari 1992 lei di enseñansa obligatorio ta na vigor i ta basá riba e derecho i deber di kada hóben pa haña enseñansa. Enseñansa obligatorio ta mará na edat òf poseshon di diploma. Pa por kumpli ku e lei di enseñansa obligatorio, kada mayor/tutor mester tin un bon bista riba e kontenido i konsekuensianan di enseñansa obligatorio.

Kontenido
Lei di enseñansa obligatorio sentral i lei di enseñansa obligatorio Kòrsou ta konsistí di un deskripshon di regla enkuanto obligashon di mayor/tutor pa:
A. Inskribí nan yu(nan) na un skol;
B. Pèrkurá pa e mucha sigui tur lès diario.

Regla di Inskripshon:
Kada hóben ta obligá na bai skol for di 1 di ougùstùs di e aña eskolar ku ta sigui, despues di e fecha ku el a kumpli 4 aña. Esaki ke men ku pa lei mayor/tutor ta obligá na inskribí e hóben na tempu na un skol, pa e aña eskolar ku ta sigui, despues ku e yu a kaba di kumpli 4 aña. E deber legal akí ta keda bálido te fin di e aña eskolar, den kua e hóben ta kumpli 18 aña òf te ora e haña su diploma di VSBO (TKL òf PKL), HAVO/VWO òf di un estudio ekivalente i rekonosé, indiká pa minister. E deber legal akí ta kaduká na momento ku e mayor/tutor por demostrá ku e no ta responsabel mas pa inskribí e hóben. Inskripshon ta tuma lugá na skol.

Regla pa bishitá skol:
Kada hóben ta obligá pa sigui e programa di enseñansa kompleto, ku skol ta brinda. Por pone un hóben di 12 aña òf mas bieu, personalmente responsabel pa stetmentu i faltamentu di skol sin motibu bálido. Pa por haña pèrmit pa dispensashon pa sigui enseñansa, mayor i/òf tutor ta obligá legalmente pa hasi un petishon na direktor di skol.

Ta duna dispensashon:
1. Si e hóben ta strobá di bishitá skol òf di sigui sierto lès, pa motibu di sirkunstansianan di salú korporal òf mental.
2. Si na ora di malesa di e hóben, e mayor/tutor pone e direktor na altura di esaki for di e promé dia.
3. Si pa motibu di sirkunstansianan imprevisto i partikular no por obligá e hóben di bishitá skol i e mayor/tutor pone esaki na konosementu di e direktor for di e promé dia.
Ehèmpel di posibel dispensashon pa motibu di sirkunstansianan imprevisto i partikular ta:
– ora tin kasamentu di un mayor/tutor,
– na ora di morto di un mayor/tutor,
– pa otro motibunan importante, na kriterio di e ámtenar di enseñansa obligatorio i e direktor, pero no pa fakansi.
4. Si pa motibunan disiplinario a ninga e hóben entrada na skol;
5. Den kaso ku un hóben bai representá Pais na un evento deportivo òf kultural, ta duna dispensashon sin kita esaki for di e kantidat di dia ku e hóben akí por haña dispensashon p’e, fuera di e dianan liber di skol, fihá pa lei. Na momentu ku ta hasi petishon pa dispensashon mester presentá ku e karta/invitashon ofishal di e organisashon(deportivo/kultural) komo preuba. E invitashon ofishal mester ta dirigí na e alumno òf mester indiká ku e alumno ta keda invitá.
6. Tambe den kaso ku un hóben tuma parti na un biahe di estudio, ta duna dispensashon bou di e kondishon ku e biahe di estudio ta keda planeá den estrecho palabrashon i koperashon ku inspekshon di enseñansa.

Prosedura pa haña Dispensashon di Enseñansa Obligatorio:
1. Mayor/tutor di e hóben ta dirigí e petishon, bon argumentá, na e direktor di skol;
2. E direktor ta evaluá i ta indiká si e dispensashon por keda otorgá konforme e sirkunstansianan imprevisto i partikular;
3. Mayor/tutor ta entregá e petishon, huntu ku desishon di e direktor di e skol, na e ámtenar di enseñansa obligatorio na e Organisashon di Ehekushon di Enseñansa i Siensia, (UOW) na Bon Biní Business Center, Schottegatweg Oost 10;
4. E ámtenar di enseñansa obligatorio ta partisipá esaki por eskrito den un deklarashon di dispensashon ofishal.

Vigilansia i kòntròl:
Pa garantisá ku kada mayor/tutor ta tene su mes na lei, gobièrnu di Kòrsou a nombra ámtenarnan di enseñansa obligatorio, ku ta enkargá ku kumplimentu di enseñansa obligatorio. Den kaso ku no kumpli ku e lei akí e hendenan ku ta hasi nan mes kulpabel na esaki por haña un but òf un straf di prizòn. Pa loke ta trata straf òf medida, lo trata kada kaso individualmente.

Sosten Sosial:
Mayor i/òf tutor di ménos rekurso finansiero por akudí na gobièrnu pa haña sosten pa loke ta trata transporte, kuminda i paña pa hóbennan ku ta bai skol. Transporte di skol, kuminda di skol i paña di skol ta loke gobièrnu ta fasilitá, ke men mayornan no por reklamá derecho riba esakinan. Por haña mas informashon di transporte na Organisashon di Ehekushon di Enseñansa i Siensia (UOW) i pa paña na Ministerio di Desaroyo Sosial, Labor i Bienestar (SOAW).

Konseho Importante:
– Motivá bo yu(nan) pa e/nan bai skol ku smak. Duna nan kontinuamente e sosten nesesario, di manera ku nan ta bai bon na skol i ta keda eksperensiá skol di forma positivo;
– Duna nos hóbennan un bon ehèmpel dor di kumpli ku e lei di enseñansa obligatorio debidamente i ora surgi problema, semper pone e direktor i/òf dosente na altura di esaki;
– Keda den kontakto ku skol pa bo ta na altura di loke ta pasa na skol. Aktua di un manera responsabel. Nos hóbennan ta nos mes responsabilidat.

Mas informashon:
Pa mas informashon por tuma kontakto ku kolaboradónan di e Unidat di Enseñansa Obligatorio di e Organisashon di Ehekushon Enseñansa i Siensia (UOW), di Ministerio di Enseñansa, Siensia, Kultura i Deporte, via numbernan di telefòn 4343702 òf 4343711 òf via email OWCS.Communicatie@gobiernu.cw.