Sertifikashon di kopia di diploma - Informashon tokante Gobièrnu di Kòrsou Bo opinion

Ministerio di Enseñansa, Siensia, Kultura & Deporte

Sertifikashon di kopia di diploma

Hopi biaha un kopia sertifiká di un diploma o lista di sifra ta nesesario pa inskribí na un instituto pa enseñansa superior. E instituto mes ta disidí kiko e ta aseptá komo kopia sertifiká. Asina tin institutonan pa enseñansa superior na Hulanda ku ta aseptá kopianan sertifiká dor di nos skolnan pa enseñansa avansá mes. En kambio, pa mayoria instituto pa enseñansa superior pafó di Hulanda, un kopia sertifiká dor di Inspekshon di Enseñansa ta nesesario.

Inspekshon di Enseñansa ta sertifiká solamente diplomanan i listanan di sifra prosedente di skolnan rekonosé pa ministerio di enseñansa. Pa sertifikashon di diplomanan estranhero o diplomanan optené na institutonan no rekonosí pa gobièrnu di Kòrsou, tuma kontakto ku un notario.

Paga tinu!

Pa averiguá nivel di un estudio hasí den estranheria, mester akudí na Sentro di Ekspertisia di Prueba & Èksamen (ETE). Aki bo diploma ta keda balorá i poné den kuadro di e nivelnan ku nos ta usa lokalmente.

Puntonan di atenshon pa sertifikashon di kopia di diploma i lista di sifra

  1. E kliente ta presentá e dokumentonan original.
  2. Inspekshon di Enseñansa mes ta saka kopia di e dokumentonan original.
  3. Solamente diplomanan, listanan di sifra i sertifikadonan di estudionan rekonosí pa gobièrnu ta keda sertifiká dor di e inspektor-general.
  4. Solamente traduktornan huramentá por hasi e tradukshonnan nesesario. E skol mes no ta outorisá pa hasi esaki.
  5. Tin dos posibilidat dependiendo di e pais unda e futuro studiante ta bai studia. Ruta number 1 ta pa paisnan ku ta afiliá na e Kombenio di Apostille*¹. Ruta number 2 ta pa paisnan ku no a firma e kombenio menshoná.

Paisnan afiliá na Kombenio di Apostille             Paisnan no afiliá na Kombenio di Apostille 

1.

Inspekshon di Enseñansa pa sertifikashon di e diploma, lista di sifra o sertifikado.

1. Inspekshon di Enseñansa pa sertifikashon di e diploma, lista di sifra o sertifikado.
2. Registro Sivil pa legalisashon di firma di Inspekshon di Enseñansa. 2. Departamentu di Relashon Eksterior (Bureau Buitenlandse Betrekkingen) pa legalisashon di firma di Inspekshon di Enseñansa.
3. Traduktor huramentá. 3. Traduktor huramentá.
4. Registro Sivil pa legalisashon di firma di e traduktor huramentá. 4. Registro Sivil pa legalisashon di firma di e traduktor huramentá.
5. Departamentu di Relashon Eksterior (Bureau Buitenlandse Betrekkingen) pa legalisashon di firma di Registro Sivil.

*¹ Legalisashon di aktanan pa uso den estranheria ta tuma por lo general hopi tempu. E Kombenio di Apostille, ofisialmente e Kombenio pa Abolí Legalisashon di Dokumentonan Públiko Estranhero, ta un kombenio multilateral ku ta regla di un forma simpel e uso di dokumentonan ofisial  (manera partida di nasementu i formularionan di duana) den estranheria. E kombenio a ser redaktá na e Konferensia di Den Haag di Derecho Internashonal Privá riba 5 di òktober 1961. E ta konta pa tur pais ku ta afiliá na e kombenio.

Den e prosedura stipulá pa e kombenio aki, un instansia ofisial den e pais di orígen di e akta ta buta un stèmpel spesial: e Apostille. Ku e stèmpel spesial aki e akta por wordu utilisá mesora den otro paisnan. Kontrolá si e pais unda bo ta bai usa bo diploma, ta afiliá na e Kombenio di Apostille.