Plan Nashonal di Desaroyo Kòrsou (NDP) - Informashon tokante Gobièrnu di Kòrsou Bo opinion

Ministerio di Desaroyo Ekonómiko

Plan Nashonal di Desaroyo Kòrsou (NDP)

Implementashon pilá ekonómiko Plan Nashonal di Desaroyo Kòrsou

Kòrsou tin un Plan Nashonal di Desaroyo. E plan aki tin komo meta pa yuda duna direkshon kon pa yega na desaroyo riba término largu i di forma duradero, pero trahando aktivamente riba implementashon di prioridatnan di término kòrtiku. E plan ta konsistí di 5 área di enfoke:

  • Edukashon;
  • Ekonomia;
  • Durabilidat (ku enfoke riba medioambiente);
  • Identidat nashonal;
  • Bon gobernashon.

E pilá ekonómiko ta e promé pilá ku ta den ehekushon. Loke Kòrsou ke logra ku implementashon di e pilá aki ta pa promové kresementu ekonómiko kontinuo i duradero, ku ta enserá trabou adekuá pa tur hende.

 Kon implementashon di e pilá ekonómiko ta benefisiá ami?

Un di e rikesanan di Kòrsou su ekonomia ta ku e ta diverso. Kòrsou su ekonomia konosé mas ku un fuente di entrada, pues na Kòrsou, un siudadano por gana su pan di kada dia den diferente sektor, por ehèmpel: sektor logístiko (entre otro: dòk i haf), konstrukshon, refineria, sektor turístiko, sektor finansiero. Mester tene kuenta ku den kada sektor tin kompanianan ku ta duna otro hende trabou i tambe tin siudadano ku ta lanta nan negoshi i bende produkto i/òf servisio ku kompanianan den un òf mas sektor. Aki nos por pensa riba, por ehèmpel: un hende ku ta duna masashi na turista na nos playanan òf un kòki ku tin un kantina den un kompania finansiero. E ehèmpelnan ku nos por duna no ta kaba, pasó e posibilidatnan no tin límite.

Rekonosiendo e rikesa aki, Ministerio di Desaroyo Ekonómiko ta trahando ya kaba riba 4 área di maneho i 2 sektor ekonómiko, pa asina stimulá kresementu di nos ekonomia i posibilidat pa mas siudadano tin trabou òf lanta nan mes kompania pa hasi negoshi den un òf mas sektor. Pues, abo por benefisiá pa medio di trabou, posibilidat pa tin bo mes negoshi òf un kombinashon di tur dos.

Kon implementashon di e pilá ekonómiko ta bai?

A skohe 4 área di maneho i 2 sektor ekonómiko pa traha riba dje. Meta final di tur e proyekto i inisiativanan mas abou ta pa brinda kupo di trabou temporal òf permanente òf posibilidat pa hasi negoshi, den sierto kaso ku mira riba eksportashon. Aki un selekshon chikitu di proyekto i inisiativanan.

 

Área di maneho/Sektor

Splikashon

Resultado pa final di 2017

Resultado pa final di 2018

1.

Sektor logístiko

Bou di e sektor aki ta kai proyektonan den i rondó di nos haf, aeropuerto i zona liber

Megapier 2, ekspanshon di sala di yegada na aeropuerto, E-commerce plaform

 

Mas turista krusero, Desaroyo den área di haf, Waaigat i Parera, aeropuerto, zona liber i servisionan aéreo i marítimo kombiná

2.

Sektor turístiko

Diferente proyekto ku ta parti integral di e Master Plan di Turismo

Treinen pa hendenan lokal bira guia turístiko

Mas “airlift”, mas turista for di sektornan di enfoke i renobashon di un kantidat di playa

3.

Promoshon di invershon

Logra pone mas spit tras di proyektonan di invershon pegá

Inisio di konstrukshon di algun hotèl

Re-apertura di algun hotèl i kontinuashon di konstrukshon di algun hotèl

4.

Klima di invershon

Logra hasi Kòrsou un pais mas fásil pa hasi negoshi

Implementashon di vários kambio relashoná ku pèrmitnan ekonómiko

Evaluashon i posibel mehorashon di e kambionan implementá

5.

Promoshon di eksportashon

Stimulashon di eksportashon

Preparashon pa introdukshon di insentivo pa fasilitá eksportashon

Posibilidat pa eksportá, kondishonnan nesesario pa eksportá

6.

Inovashon

Stimulá inovashon den Kòrsou su ekonomia

Preparashon pa introdukshon di insentivo pa fasilitá inovashon

Treinen pa siña traha app na Kòrsou,

 

 A krea grupo di trabou multidisiplinario pa traha riba kada un di e proyektonan ku a identifiká. Tin hopi mas proyekto, pero a hasi un selekshon chikitu den e kaso aki.

Kon ami ke benefisiá?

Bo tambe por benefisiá! Kua sektor lo bo ke traha aden? Kiko bo ta bon den dje? Bo a yega di pensa na tin bo mes negoshi? Si bo lanta bo mes negoshi kiko lo bo bende? Bo a yega di pensa na eksportá loke ya kaba bo ta bendiendo ku éksito na Kòrsou? Bo a yega di tin un idea inovativo ku nunka bo no a hasi nada kuné? Bo sa unda bo tin ku akudí si akaso bo ke lanta un negoshi? Bo sa unda bo tin ku akudí si bo ke registrá pa haña trabou?

Kontestá e preguntanan aki i deskubrí pa bo mes

kon abo ke benefisiá di e proyektonan ku nos ta manehando pa bo!

Bo ke sa mas? www.korsoukapasita.org

                         www.facebook.com/korsoukapasita