Despues di un periodo di preparashon largu i intensivo di parti di tantu skol, direktivanan di skol komo e Sentro di Expertisia pa Prueba & Èksamen (ETE), 2386 (2017: 2317) kandidato pa èksamen di 20 skol di Kòrsou ta kuminsá ku nan èksamen sentral final pa vsbo, havo, vwo. Djaluna 07 di mei 2018, ta kuminsá e periodo de èksamennan sentral final pa 594 kandidato pa èksamen havo i 138 pa vwo di Enseñansa Avansá. Èksamennan vsbo ta kuminsá djamars 08 di mei 2018 pa 1654 kandidato di kua tin 457 vsbo-pbl, 442 vsbo-pkl i 755 vsbo-tkl kandidato pa èksamen ku ta bai pasa èksamen final. Sinembargo e èksamennan sentral práktiko pa pbl i pkl a kuminsá kaba den luna di aprel (09 – 25 aprel 2018).
Durante mas ku tres siman kandidatonan pa èksamen na Kòrsou lo traha nan èksamen ku lo determiná si nan a sera nan periodo na vsbo òf havo òf vwo ku éksito. Hopi lo sigui, después di e éksito akí, ku un estudio den un instituto di enseñansa mas avansá adekuá, sea lokalmente òf na otro pais. E kantidat di mas grandi di studiantenan ta bini di enseñansa profeshonal sekundario preparatorio (vsbo). E aña aki ta di 15 biaha ku tin èksamennan final pa vsbo (sistema nobo). Den vsbo ta hasi distinshon entre tres trayekto edukativo: PBL (Trayekto edukativo Profeshonal Práktiko), PKL (Trayekto edukativo Práktiko pa formashon di Kader) i TKL (Trayekto edukativo Teóriko pa formashon di Kader).
E grupo di kandidato di mas grandi ta pasa èksamen TKL, esta 755, muchu mas, 88, ku e aña anterior. Pa PKL esaki ta 442, un subida leve di 15 kompará ku aña pasá i PBL 457, kual ta un subida chikí di 5 kompará ku aña pasá.
Na total tin 15 skol vsbo na Kòrsou ku ta pasa e èksamen final. Kompará ku aña pasá e kantidat di kandidatonan pa èksamen havo ku e aña akí ta pasa èksamen na Kòrsou ta algu mas, esta 594 respekto di 578, esta 16 mas. Pa vwo tin 138 kandidato ku ta pasa èksamen final e aña aki, kual ta 55 ménos ku aña pasá. E kantidat total di skolnan havo i vwo ku ta partisipá ta 7 di nivel havo i 6 di nivel vwo.
Roster pa èksamennan sentral
Pa havo i vwo e èksamennan di promé periodo ta kuminsá djaluna 07 di mei 2018 ku e èksamen sentral final ‘Informátika’. Vsbo pa tur trayekto edukativo, PBL, PKL i TKL, ta kuminsá djamars 08 di mei 2018 ku e èksamen sentral final ‘Hulandes’.
E periodo di èksamen pa loke ta trata e promé periodo pa vsbo ta finalisá djabièrnè 25 di mei 2018 ku e èksamen sentral final ‘Spañó’ pa tantu trayektonan edukativo PBL, PKL komo pa TKL. Pa havo i vwo e periodo di èksamen pa e promé periodo ta finalisá djaluna 28 di mei 2018 ku respektivamente e èksamen sentral final ‘Biologia ‘ i ‘Spañó’.
E di dos periodo, esta repaso di èksamen, pa e èksamennan práktiko vsbo ta tuma lugá den e periodo di 11 te ku 15 di yüni 2018. Pa èksamennan sentral teorétiko final vsbo, havo i vwo, e di dos periodo ta di 18 te ku 22 di yüni 2018.
Resultado èksamennan final
ETE ta responsabel tambe pa fiha e normanan di e èksamennan. Esaki ta tuma lugá basá riba un método sientífiko. E normanan pa e promé periodo di èksamen di ETE lo ta konosí pa tur tipo di skol pa mas tardá djárason 13 di yüni 2018. E normanan pa èksamennan ku ta bini for di Hulanda tambe lo ta konosí djárason 13 di yüni 2018.
Ta spera ku resultadonan di èksamennan final promé periodo ta konosí pa mas tardá djabièrnè 15 di yüni 2018. Kandidatonan di èksamen ku a pasa e èksamen di nobo, por spera nan resultado pa mas tardá djabièrnè 29 di yüni 2018.
Liña di èksamen ETE
Pa reakshon i opservashon tokante èksamennan, ETE tin un liña di èksamen. A organisá e liña di èksamen den grupo di vak i e ta intenshoná pa skol i kandidato i otro interesadonan. Pa medio di e liña di èksamen por raportá problema i hasi opservashon i remarke tokante e èksamennan. Naturalmente por raportá reakshonnan general tambe riba èksamennan. E liña di èksamen-ETE ta registrá i ordená tur e notifikashonnan pa grupo di vak, ku despues profeshonalnan di konstrukshon di èksamen di ETE ta atendé ku e koutela nesesario. Dependiendo di e tipo di notifikashon, ta atendé esaki direktamente durante òf despues di e periodo di èksamen.
E liña di èksamen ta alkansabel den e periodo di èksamen na e number di telefòn general 4343-766 i/òf via di e numbernan di kada profeshonal di konstrukshon di èksamen di ETE. Tambe por manda reakshon na e e-mail adrès info@ete.cw
Sentro di Ekspertisia pa Prueba & Èksamen (ETE) i e kolaborashon entre paisnan den Reino
Sentro di Ekspertisia pa Prueba & Èksamen (ETE), e organisashon ehekutivo den Ministerio di Enseñansa, ta responsabel pa entre otro, konstrukshon, tradukshon, produkshon, distribushon i determinashon di normanan pa Èksamennan Sentral Final pa Enseñansa Avansá. ETE ta produsí un total di 116 èksamen vsbo pa aña (promé i di dos periodo) i 28 èksamen pa havo i vwo (promé i di dos periodo). E produkshon di èksamen ta kuminsá mas ku 1,5 mei promé. Èksamennan ku ta bini for di Hulanda, ta prinsipalmente èksamennan pa havo i vwo. Di un kantidat di èksamen vmbo-gl-tl (=vsbo tkl) ku ta bini for di Hulanda ta hasi un screening delantá pa loke ta un konteksto adekuá. E trabou ku ETE ta hasi ta unu di hopi presishon i eksaktitut ku ta tuma lugá den kuadro i planifikashon estrikto.
Apesar di e posishon independiente di e otro paisnan den Reino ta eksistí ainda un kolaborashon riba tereno di e èksamennan sentral final ku Hulanda i Sint Maarten. Tantu pa Boneiru i Sint Eustatius komo pa Sint Maarten, ETE ta entregá for di 10-10-10 a base di un konvenio di trabou èksamennan sentral final pa enseñansa avansá. Pa Boneiru i Sint Eustatius e kantidat di èksamen e aña aki ta muchu mas ménos relashoná ku introdukshon di e lei di enseñansa hulandes riba e asina yamá islanan BES.
Tambe ETE ta tradusí èksamen na Papiamentu pa e skol SKAIH (úniko skol ku idioma di instrukshon na Papiamentu) pa PBL, PKL i TKL i tambe na Ingles pa dos skol na Sint Maarten.
ETE ta deseá tur kandidato di èksamen forsa i hopi éksito ku nan èksamennan final.
********************
